राज रा मोहरा बदळ-बदळ
मिनखां रो लोई-बैवावै है
किंयां मिटासी ईं पीड़ नैं
जीवण घणोंई-तरसै है...॥
भासा नैं लड़ावै भासा सूं
घणै जात री चाल्यां चालै है
लोक-समाज रा भासण झाड़ै
धरम रो नांव लजावै है...॥
संख बजै अर बांग लगै व्है
मिन्दर-मसीत है भाठै रा
राम-रहीम अर अकबर-अल्ला
जीवण-जीवण रा रखवाळा...॥
राम नैं चावै घणा-बांटणा
कोई-कोई आड लगावै है
लड़-लड़ मिन्दर-मसीत लारै
मुल्क नैं सूरत बतावै है...॥
कोई केवै कसमीर है म्हारौ
कोई पंजाब नै बांटै है
कोई बांटणों चावै बिहार नैं
कोई आसाम उजाड़ै है...॥
म्हांनै जुट-जुट बांदरियां
अदरख रो सुवाद बतावै है
फाड़-फाड़ भागवत रा पाना
ग्यानी ग्यान लुटावै है...॥
कसमीर म्हारौ है म्हारौ रैवैला
न्यारो पंजाब नैं कुण करसी
सागी बिहार-बिहार रेवैला
हर्यो-भर्यो आसाम रैसी...॥
राज रा मोहरा...
...तरसै है...॥
