मीठै बोल सूं मोटौ
मिनख रौ मोल कोनीं रे
कड़वै बोल सूं कड़वौ
जहर रौ घोळ कोनी रे
रूप रंग रूड़ौ रूपाळौ
कंठ हद सोवै कंठाळौ
मच्यौ मतवाळ मूंछाळौ
परख री तोल कोनीं रे
बजारां ढमक-ढम बाजतौ
नटी संग ताल ज्यूं नाचतौ
गळी में घूमरां रमतौ
जुधां रौ ढोल कोनीं रे
मांग में मोतीड़ा भर ले
रूप रंग रूपै सूं रंग ले
पिया री प्रीत बिन सजनी
हियै हिलोळ कोनी रे
चमकतै चांद बिन रजनी
रंगीलै साथ बिन रमणी
सुरीलै साद बिन रस री
छळकती छोळ कोनी रे
मूरख नै मेहणौ देणौ
गेलै नै गेहणौ देणौ
आंधै नै ओळमौ देणौ
अकल री ओळ कोनी रे
मीठै बोल सूं मोटौ
मिनख रौ मोल कोनी रे
