आवौ कदैई
आथूणियै खेत रै
उण मथारै
बैठ’र
करांलां बंतळ,
मखमल सी उण बाळू
रेत सूं मुठ्ठी भर
उचाळांलां
एक दूजै माथै,
चढांलां
उण गैरकी
खेजड़ी ऊपर
अर
करांलां
जोर-जोर सूं
उकारिया
जिणसूं गूंजैला
तालरियौ
जकौ कैई बरसां
सूं सूनो पड़ियौ।
पियांला
पावरियौ भर
झैला दीनूड़ै
उण टांके रौ पालर पाणी
जिणसूं
कदैई तिरस
बूझावता आडियै
मारग चालता
मैळायतिया।
बणावांलां
भींजौड़ी माटी रा
घरकोलिया।
धौरे रे मथारै
ठेठ टींकोळी चढ’र
निरखांलां
उण हरियल खेतां नै
कुळांचां भरतै
उण हिरणां नै
दौड़ते रोजडां नै
अर
अरणां री
गैरगी माट री
ठाडी छांव में
कळाव करते उण मोर नै।
आवती बखत
घर सूं
गरणै में बाध’र
ले आणां
कांदो रोटी
जीमांला
साथै बैठ’र।
पण-
कीकर जावांलां
उण धोरै री पाळ
मिटगी वा पगडांडियां
धोरै रै चारूं कानीं
हुयगी बाड़।
