मरजादा मांदी व्हे बैठी, करगी काण किनारो बापू
बदळ्यो टेम बदळगी दुनियां, बदळ गयो हैं धारो बापू
आप आपरी खींचे ताणै
दूजां नैं नाजोगा जाणै
पाप धरम नैं नहीं पिछाणै
टिकै न कोई अेक ठिकाणै
'आपा' नैं अहंकार खायग्यो, रहग्यो थारो म्हारो बापू
बदळ्यो टेम बदळगी दुनियां, बदळ गयो है धारो बापू
खोटा दिन भोगे हैं खादी
देखै खुद अपणी बरबादी
धोळचोळियां धींगामस्ती
कर कर नैं हथिया ली गादी
लोकराज से आज रुखाळो, तूंबां वाळो भारो बापू
बदळ्यो टेम बदळगी दुनियां, बदळ गयो है धारो बापू
चाल्यो है बदळण रो चाळो
चढ़ चढ़ नैं चौबारां भाळो
आज अमावस पूनम भेळी
अंधियारै रो दास उजाळो
आजादी अधबिच में अटकी, सबळ न कोय सहारो बापू
बदळ्यो टेम बदळगी दुनियां, बदळ गयो है धारो बापू
तणातणी रो तोतक रासो
घर घर फैल गयो है खासो
समदर नैं पाणी धमकावैं
पूळां सूं भयभीत पचासो
बेकदरा है आज बडेरा, कळजुग बहोत करारो बापू
बदळ्यो टेम बदळगी दुनियां, बदळ गयो है धारो बापू
हक खातर मलफै हर कोई
करतब - पथरी सुधी न सोई
प्रेम-बीज पसवाड़े फैंक्या
बध बध नैं विष- बेलां बोई
बोती टेम बिचारी कोनी, लागै अब फळ खारो बापू
बदळ्यो टेम बदळगी दुनियां, बदळ गयो है धारो बापू
आप जकी देग्या आजादी
आं उणनैं उळटी लटका दी
ज्यां त्यां गाँधी- छाप कबाड़ै
बै बाजे है गाँधीवादी
इण गत नित बदळै उपमावां, ओ जग ओगणगारो बापू
बदळ्यो टेम बदळगी दुनियां, बदळ गयो है धारो बापू
धनवानां रै नोट रूप थूं
नेतावां रै वोट रूप थूं
विद्वान र वाद-विमर्सा
दीन घरां लंगोट रूप थूं
है भारत रैं हर घर आँगण, चावो चित्र तिहारो बापू
बदळ्यो टेम बदळगी दुनियां, बदळ गयो है धारो बापू
सारा नाम तिहारो लेवै
(पण) आदर नहीं उद्धरण देवै
मत ना बुरो मानजे बापू
जदै कदै कानां सुण लेवै
बंदै या निंदै पण पक्को, फिकरो- जिकरो थारो बापू
बदळ्यो टेम बदळगी दुनियां, बदळ गयो है धारो बापू
छण छण बात सागीडी छणगी
आम धारणा इसड़ी बणगी
थारी दुसमण पदव्यां थांरी
'बापू' और 'महात्मा' बणगी
आं पदव्यां रै कारण दुनियां, लियो तिहारो लारो बापू
बदळ्यो टेम बदळगी दुनियां, बदळ गयो है धारो बापू
कारण साफ दोष नीं म्हांरो
पाप पोटळो भारी आरो
'बापू' असमत रा बोपारी
बेट्यां नैं डर निज बापां रो
लंपट लोभी कुटिल महात्मा, किण विध व्हे पतियारो बापू
बदळ्यो टेम बदळगी दुनियां, बदळ गयो है धारो बापू
पढ़ कर मत पछतावो करजे
समै देख हिय धीजो धरजे
ओजूं मत आजे इण भारत
मत ना फेर कुमौतां मरजे
चालै ज्यूं चालण द्यै चरखो, मत करजे चूंकारो बापू
बदळ्यो टेम बदळगी दुनियां, बदळ गयो है धारो बापू
