हरी घास रा उण खूंणांमें
बाथां बधिया मरद- लुगाई
नैण-नैण में नैण ढाळता
भूल जीवता जूण पराई
ज्यूं ऊभा हा
सोचूं हूं वै भावै जोग मिल्या हा
अबै बिछड़ग्या व्हैला
छांनै-ओलै प्रीत करी ही
कांकण-डोरै बंधग्या व्हैला
के दोनां रा पूत आंगणै रमता व्हैला
कुण जांणै अब तांईं दोनूं मरग्या व्हैला
पण जद ई आऊं इण बाग फिरण नै
अै कणोर रा फूल्या-फूल्या फूल न दीसै
हरसिंगार री अै झड़ती काळियां थम जावै
हरियाळी मर जावै सगळी
जीवै फगत बात में वै ई
हरी घास रा उण खूणा में
बाथां बंधिया मरद-लुगाई
नैण-नैण में नैण ढाळता
भूल जीवता जूण पराई।
