तूं बड़ भागण जलम भोम है
तूं सें की महतारी गोदी
गोदी थारी लागै म्हानै
सुरगां स्यूं भी प्यारी
जगती रचूं न्यारी। मां मनस्या,
भूखा तिस्या रै ना कोई
ना होवै दुखियारी
कार मजूरी चालै घर-घर
छावै आनन्द भारी
फैले ना बेकारी। मां मनस्या,
भेद भाव मिट ज्यावै रै ना
छूवा छूत बीमारी
मंगळ गीत धरा पर गूंजै
साख बधै मिनखांरी
हरखै सै नर अर नारी। मां मनस्या,
निपजै धान मोकळो बढज्या
धरती हरीयाली
तेरा पूत सूरमा करसी
सींवा री रखवाळी
अै बाकां बलकारी। मां मनस्या,
