मा-अेक
हां म्हैं!
म्हैं फेरूं
आसरो चावूं
थांरी गोद
खेलणो चावूं-
धाड़-धुक्कड़
इक्कड़-बिक्कड़...
बेलियां भेळो
सुणनी चावूं
थांरी बकाई
खावणी चावूं मार
थां रै कंवळा हाथां
जिकां उबाकता अवस,
मारता कदैई नीं..!
पण
आज मार...
हां मार
खावणी चावूं
थां रै हाथां
इण मिस
रिसाणो हुय’र
सूवणो चावूं मीठी नींद
थां रै खोळै
मा..!
मा-दो
लागती नीं सरदी
नीं गरमी
करतो ई नीं
कोई असर मौसम
थां रै थकां मासा...
थै हुया ब्हीर
नूंवी जातरा सारू
म्हैं नीं सह सकूं सरदी
नीं गरमी
फकत थांरी ओळू रै गाभां!
मा-तीन
कारी लाग्योड़ी हाफपैंट
जतन री सींवा सांभ
हिये तणै हेत
लोटै सूं इस्तरी करता
अणूतै चाव पैरता
टुर बहीर हुवता-स्कूल
थांरी इण सीख सागै-
‘‘स्कूल में ध्यान राखजै,
घरां आवता ई खोल हाफपैंट
खूंटी टांग देइजै...''
कितरी सवाई ही म्हारै सारू
अेक हाफपैंट
अर अेक मा !
मा-च्यार
पेटी मा री
बरसां पुराणी
स्यात कळकतै सूं मंगवाई ही।
जीसा री तिणखा सूं
घर रौ गाडो गुड़कांवता
कसालो भोगता
आनो-पइसो बचा’र
राखता इणी पेटी में!
हां, अजेस पड़ी है
आ पेटी मा री
साळ रै पाखती ओरै मांय।
पेटी है
मा नीं रैया
कैवां सुरग सिधारग्या
पण कळकतैआळी आ पेटी
फगत ओळूं है मा री
कै कीं और ई?
