बेटियां रै जलमण सूं नीं बाजै
कांसी री थाळी
उड़ जावै चैरां री लाली।
घास रा पूळां ज्यूं
बधती बेटी नैं
बाप देख-देख'र
सूको कांटो बण जावै
उण नैं काची उमर मांय करणा पड़े
झाडू-मसोता
चुन्नी हुय जावै अंगोछो
आटा गूंथण री भांत काम मांय
खुद नैं गूंथणो,
सुपना नैं सिकती रोटी ज्यूं सेकणो।
डांट-डपट, डर-भौ
सदीव सूं चुप रैवण अर
कम बोलण री सीख देवता
मां अर बापू री चिंता
बेटी रा हाथ पीळा करण री
इण बोझ सूं मुगत होवण री।
जमाना रै लारै बेटियां भी
बणगी है-
इंजीनियर, डॉक्टर,
वकील, टीचर, पायलेट।
बेटियां-
कुलदीपक न सही
कुलदीपा बण'र
दो घरां रो नांव करै।
लुगाई री जूण
पाणी, चूल्हो, चौका-बरतन।
घर-बार सूं लेय'र
ओफिस-दफ्तर, स्कूल,
कोर्ट-कचैड़ी, अस्पताळ
सगळी जिम्मेदास्यां संभाळे।
कदैई मां
कदैई बैन,
कदैई लुगाई बण'र
राजी राखण रा फेरा मांय
खुद री पीड़ा नैं भुळावती रैवै
पाणी री भांत बैंवती, स्सो सैंवती रैवै।
