लै कठा-कठा सूं रंग
मौळियो रंगियो रंगरेजण!
सूरज सूं लाली माँग
लाय चन्दा सूं घणों उजास।
आभै सूं ले विस्तार
निखतरां सूं ले नैं लीलास।
लीनौ परोडिया सूं
मांगै नैं मुधरो आकरसण!
लै कठा-कठा सूं रंग
मौळियो रंगियो रंगरेजण!
धरती सूं लै नैं पनौं
समदरां री छोळां सूं भांत।
तारां सूं लै टिबकियां
जड़ा; आई मन नैं नैंरांत।
पल-पल लहराणो लियो
पवन सूं पाटक अंगेजण!
लै कठा-कठा सूं रंग
मौळियो रंगियो रंगरेजण!
लै नैं गुलाब सूं चटक
हजारीगळ सूं रंग पीळो।
कमळां सूं भर कूंळास
मौळियो ओढ़यो चमकीलो।
सिंझा सूं लोनी चोर
भंतीली भांतां थें गिण-गिण!
लै कठा-कठा सूं रंग
मौळियो रंगियो रंगरेजण!
