नयापरा सूं अणतपरा तांईं
कुन्हाड़ी सूं बोरखेड़ा तांईं
चौंका चौंक यो हो ग्यो
कै कोटो टोकियो हो ग्यो
कोटो टोकियों हो ग्यो रे।
टेसण सूं तो गणेस नगर
रंगबाड़ां की डगर-डगर
फ्लाई ओवर अंडर पास
बण ग्या देखो घणा जम’र
जाम सूं मुगत हो ग्यो
कोटो टोकियो हो ग्यो
कै कोटो टोकियो हो ग्यो रे।
भारत माता गार्डन छै
चम्बल रिवर फ्रंट
सात अजूबा अेक लारां मं
मारै छै करंट
घणा दनां मं आबा वाळो
जाणे ख्हां खो ग्यो
कोटो टोकियो हो ग्यो
कै कोटो टोकियो हो ग्यो।
अभेड़ा मं बायोलोजिकल
दर्रा मं न्हार की चल
किशोरसागर हरदा मं छै
चंबल ब्हैरी कळ-कळ
हैंगिग ब्रिज सूं हींदा हींद यो ग्यो
कोटो टोकियो हो ग्यो रे
कै कोटो टोकियो हो ग्यो रे।
साफ चलकणी सड़का सूं
भुर्राट्या का फड़का सूं
नंईं-नंईं लाइटा लागी
चौराया का खड़का सूं
घणा दनां आयौ जै तो
चक्करबूळी हो ग्यो
कोटो टोकियो हो ग्यो
कै कोटो टोकयो हो ग्यो रे।
कॉलेज-कोचिंग पेपर वाळा
मास्टर, डॉक्टर, बिजनेस वाळा
घणा चालर्या धंधा न्याळा
खेलां सूं बॉलीवुड तांईं
छार्या छै कोटा वाळा
दनां दन मं ‘हरप्रीत’ स्मार्ट होग्यो
कोटो टोकियो हो ग्यो
कै कोटो टोकियो हो ग्यो रे।
