करमां री लकीरां नै कायर सीस निंवासी,
पिण सुळझ्या सबळां नै सुभ मारग मिळ जासी।
रीत-भांत रौ डर कर्यां सूं जनम अकारथ जावै छै,
खूंटै बंधिया ढोरां रै ज्यूं निकमा चक्कर खावै छै,
कूवै पड़िया हीरां नै कुण मूरख परखासी,
करमां री लकीरां नै कायर सीस निंवासी।
भाभौसा री भोळावण सूं पूंछ पकड़ली पाडै री,
मारग काटण आस राखणी पूठी टूटै गाडै री,
हाथ बिखेरया हीरां नै दूजा कुण सिरकासी,
करमां री लकीरां नै कायर सीस निंवासी।
पिंडतजी रा पोथी-पांना ठग विद्या रा ठागा है,
साधू पंडा जग गाडै में जुतिया माठा ढागा है,
अै ओझा अक्कल री सीरां नै खाडै में खड़कासी,
करमां री लकीरां नै कायर सीस निंवासी।
मैल-माळिया मोटर वाळा बिना कांम रा ठाटा है,
कमतरियां री छाती ऊपर अै चुणियोड़ा भाटा है,
पोखौ मत यां खीरां नै झूंपां लाय लगासी,
करमां री लकीरां नै कायर सीस निंवासी।
उण जूंनै मारग क्यूं जांवो जो ले डूबै खाडै मैं,
कूद्यां तिरस बुझैला कीकर कादै भर्यै नाडै में,
पोहरौ सूंप्यौ अमीरां नै सूतौड़ां नै खासी,
करमां री लकीरां नै कायर सीस निंवासी।
लारै जोता मारग चालै वांरा दांत रंगीजैला,
मूवा बाप रै करै छतरियां वांरा टाबर भीजैला,
मांग्या ढोल मंजीरां नै गीतड़ला कद आसी,
करमां री लकीरां नै कायर सीस निंवासी।
सोच समझनै मारग लेणौ फेर चालणौ हिम्मत कर,
धन माया अर कुटंब कबीलौ रीत-भांत दुनिया रौ डर,
तोड़ौ सब जंजीरां नै कटै गळै री फांसी,
करमां री लकीरां नै कायर सीस निंवासी।
सोच समझनै मारग लेणौ फेर चालणौ हिम्मत कर,
धन माया अर कुटंब कबीलौ रीत-भांत दुनिया रौ डर,
तोड़ौ सब जंजीरां नै कटै गळै री फांसी,
करमां री लकीरां नै कायर सीस निंवासी।
