परभाती गावती,
नीरौ घालती,
थेपड़ी थापती,
भूंगळी सूं
चेतन करती चूल्हो,
फलकां सागै पोंवती ममता
राख सूं बरतण मांजती
होठां में सबद बांचती
थूं
कींकर कमल ज्यूं
निसंग रैवती ही?
तपतै माथै पर पाटी बदळती
उधड़या सुपनां नैं सींवती
मन रै घावां लूपरियो बांधती
सुटर मांय प्रेम बुणती
थूं कींकर गुलाब ज्यूं रैवती ही?
मां
रेत हुवण रो मरम
थासूं अळगी होया समझूं म्हैं
पण
होय नीं सकी
कमल, गुलाब कै रेत...
