कुण कैवै काळ पड़ग्यो?
कठै है काळ?
तिसाई धरती रै ताळवै चिप्योड़ा
बळबलती बाळू सूं भूंज्योड़ा
फूस री टापर्यां अर झूंपा रा
उजड़्योजड़ा गांवां अर ढाणियां रा
अै निरभागिया जीव
क्यूं जलम लियो इण खोड़ में?
कायर हा, बुझदिल हा, बेवकूफ हा
आं रा पुरखा
जिका इण निरभागी धरती में,
लुक’र प्राण बचाया!
लूंठा हा, बीर हा, सायर हा बै
जिका माळ री धरती नै दाबी राखी
अर देसनिकाळो दियो बां नाजोगां नै
तन तोड़ मैनत कर भी
जिका दो जूण टुकड़ा नीं तोड़ पाया
गधां री ज्यूं लद-लद भी
जिका टेम पर दाणा री जगां लाता खाई
बांरै खातर धरती रा सुख कोनी सिरज्योड़ा
भाग री भ्रगु संहिता में
बां री कुंडळी नै जगां कोनी!
अै अंजन रा कुआ, अै दाखां रा खेत
अै गरणाता ट्रैक्टर, अै कोसां लग खेत
अै छळछळती नहरां, अर कमतरिया चाकर
अै फारम, अै जीपां, आ दारू, आ चौधर
सुख रा अै साधन बां रा कियां हो सकै?
बीजळी सूं गरमायोड़ा
बीजळी सूं ठण्डायोड़ा
बीजळी सूं चमकायोड़ा,
बीजळी ज्यूं पळपळाता
अै आलीसान बंगला!
बांरा कियां हो सकै?
अै कुन्नण ज्यूं दमकती,
चन्नण ज्यूं महकती
नागकुंडाळा सा केसां रा जूड़ा सजावती
चोळीदार ब्लाउजां में
गोरै चीकणै डील रा पळका मारती
टेरालीन में सरसर करती,
सरसराती कारां नै दोड़ाती
अै नाजूकड़ी हिरणाखियां–
बांरी कियां हो सकै?
धरती रो ओ सुरग बांरो है
जिका भुजबळ रा धणी है
जिका गज रो काळजो अर
मिनख रो मगज राखै
जिकां में होसलो है संघर्षां सूं जूझणै रो
अर सामरथ है घिरतै बखत सूं
बांथां भर लड़णै रौ।
जीव रो भख जीव ई है, नेम यो कुदरत रो
मछली नै मछली खा, जिनावर जिनावर नै
मिनख नैं मिनख खा, बस फरक है खाणै रो
जीवैलो बो ई, जिको दूजां नै खा सकै
खाय’र पचा सकै
जीवण रो हक तो बस समरथ ई ले सकै।
अै तस्करिया नेता, अै घूसखोर अफसर
अै दळबदळू अेम. अेल. अे., सोदागर मन्त्री
आ लाइसेंस परमिट री बिराजारण सत्ता
अै काळा रे नांव पर तकाब्या रा गटका
अै फर्जी मजूर्यां लिख तिजूर्यां भरणा
अै अरबां रा करज कर्यां बीस-बीस बरसां
धिन अै ‘विकास’ नै दाणां नै तरसा!
अै सगळा साच है, सास्वत है, आदू है
फरक है नांव रो, तरीकै रो ढंग रो!
बै राजा, बै राण्यां, अै नेता, नेताण्यां
बै जागीरां बंटती, अै परमीटां कटती
न भेद है जमानै रो, न काम रो भेद है।
आज जिका भोळा है, निरबळ है, भूखा है
बै पैलां भी भोळा हा, निरबळ हा, भूखा हा।
भाग रै भरोसै जिका गोडां पै माथो टेक
जुग-जुग सूं मेह री उडीक में बिताई जूण
बानै हक जीवण रो? किसो ओ कायदो?
जीवण री चाह बा, दीवै री लोय सी
चीरती निरासा रो घटाटोप अंधारो
संभळ-संभळ, कांटां नै करड़, पग मांडती
बढ़ती ई जावै बस अणथक बण चालती।
काळ रै नांव सूं भीख पर जीवणियां
दान रा दाणा खा दान-जळ पीवणियां
दया री मजूरी पर माटी सिर ढोवणियां
भूख रै रोग सूं झुर-झुर कर रोवणियां।
मिनख रा जाया, थे हांगो कर ऊठो!
ललकारो बखत नै, गरमावो खून नै।
पूरब रा मेघदूत संदेसो लाया है।
नक्सल री बाड़ी सूं खून री गरमी रो
करसां री ललकारां धूजती धरती रो
धान रै खेतां रंग-राचती जवानी रो।
पूरब रो हेलो ओ टकरायो समदां जा
नक्सल री आंधी लगी केरल री कांकड़ा।
जठै-जठै करसो है, भूख है, काळ है
बठै-बठै नक्सल री क्रांति भूचाळ है।
नक्सल है बाड़मेर, नक्सल है बीकानेर
जैसलमेर, जोधपुर जालोर नक्सल है
लाखां रै मोल री करसै री जिंदगी
दाणां बिन पाणी बिन दम तोड़ै जठै-जठै
बठै-बठै गांवां में, ढाण्यां में, झूंपां में
नक्सल री आतमा चीख-चीख ललकारै
ऊठो रै करसो, मांटी मुरधरिया,
थारी ठोकर सूं जुग पसवाड़ो फेरसी।
