नींत पिसाची नाचै नागी
देखो! बाड़ खेत नै खागी—
करिया ज्यो करसणां बिजूंका
खेत खाण नै सिगळा ढूका
रुखवाळां री लख लाचारी
चिड़क्यां पूंख पेट भर खारी
नसो कियां मालिक नादीदा
मिळ-मिळ चोरां किया मलीदा
रोक-टोक कोई कुंण राखै
सींत तणां फळ हर कोई चाखै
उसतादां री उड नै लागी-देखो।
जणता सत्ता जिकां नै सूंपी
चतरां मिळर जबर सूं चूंपी
मिनखां रा रैग्या मनसूबा
डाकीड़ा सत्ता ले डूबा
बणग्या हंस सभी बेचारा
पड़्या कागलां रा पौ बारा
लोक मता री नाम उलटगी
डूंगी हारणियां री डटगी
बैठा लखो ख्याळ बैरागी-देखो
डोर हलाड़ै दूर मदारी
कठपुतळी मजबूर बिचारी
बैठ कहै बैठसी बन्दर
‘उठ’ कहै उठै खिण अन्दर
ताकत तज ताकत सुख भोगै
मेवा-मिसरी खूब अरोगै
पर-कांधै बन्दूक चलावै
अपकरमां फळ कींकर पावै?
छळ-बळ बेल अकासां छागी-देखो।
भीखम, द्रोण सभी भै खावै
दुरजोधन बैठो मुसकावै
नींत बिदुर री कौंण सांभळै
परपंच चार्यूं मेर पळै
पड़ग्यो पख पंडवां रो पोचो
सब मिळ लोग हिया में सोचो
चीर-हरण री लीला चाली
गुजरातण बण री पांचाली
कैरव भीड़ कठा री आगी-देखो।
अब कोई किसन कठा सूं आवै
गीता तणों ग्यान समझावै
पारथ कुण गंडीव पकड़सी
झळां आग दीठ कद झड़सी
कैरव-दळ संहार कियां ही
दिन पलटै बलिदान दियां ही
मोह प्रांण सूं राख्यां मरदां
गहर कठै न अघेरी गरदां
जुग पलटै ‘जन-सत्ता-जागी’ देखो।
