आवौ आपां
घोड़ा दौड़ावां
आं डूंगरां सूं
बोल बतळावण
चोखी नी
आं रा ताता भाटा
काळजो तपावै
आं रो अंधारो
रोसनी रै मांय भी डरावै
अै साव जून विरछ
आं री जड़ां में
रगत नी
आं री जंगळाऊ ओळख
बोदी पड़गी
कुंहाड़ी रा दाँत
चाबग्या सगळा जंगल
आवौ आपां
घोड़ा दौड़ावां
ठींगणै मुलक री ताकत
घास अर पत्यां रै मांय
लुक्योड़ी है
जमीन नै सूंघो मत
इण री सौरम
आपां रै काळजै में है
जगावो-जगावो
नंगारा बजावो
स्यात इण री आँख खुलै
पसीनै री सौरम सूं
खजानै रा ताळा टूटै
आवौ आपां
घोड़ा दौड़ावां
थे पलट'र पाछा नी देखो
मत उडीको
किणी रो हेलो
मत सोचो
किणी रै वास्तै
थांरी आंख्यां रै मांय
थम्योड़ा सवालं रो
पडूंतर
आं सौदागरां कनै नी है
नी भाग सकै
पत्थर री मूरत
थां सागै
थे फगत असवार हो
आं डूंगरां
ई जमीं
अर ई मिनखाजूण सारू
तो आवौ आपां
घोडा दौडावां।
