डीगौ बड़लौ बरसां जूंनौ मोद करै बणग्यौ अविनासी
डिगमिग डाळा डाडै जिणरा आज पड़ै कालै पड़ जासी।
मुळके मत ना बीज बावळा हां करतां कुम्हलासी
ढांढा चरसी पगां किचरसी आंधी आयां थूं दब जासी
नेहचौ कर रे बूढ़ा बड़ला म्हारी जड़ां पंयाळां जासी
मोसा मत दे जूंना तरवर कूंपळ रा दिन कालै आसी।
कूंपळ होड करैला कीकर म्हैं धरती रा अमर रुखाळा
रूप संवारण फूल पांनड़ा हेल्यां रै हींडण नै डाळा
साखां आज अलेखां पसरी जकी झूमती देवै झाला
रैण बसेरौ करै पंखेरू पांन पांन बणिया है माळा
लोग बैठसी जाडी छींया थनै बावळा कुण बतळासी
नेहचौ कर रे बूढा बड़ला म्हारी जड़ां पयाळां जासी
मोसा मत दे जूंना तरवर कूंपळ रा दिन कालै आसी।
पैला धरती चीर काळजौ बीज फूटतां ई मुळकावै
देवै तपत तावड़ौ सूरज बायरियौ झीणौ हुलरावै
पांणी हरख बादळा देवै पाळ बटाऊ आय बणावै
पांतर मत आ बीज पांगरै वेळां आयां बिरछ कहावै
बीती बात चितारौ इतरी जुग जूंना गाडा लद जासी
नेहचौ कर रे बूढा बड़ला म्हारी जड़ां पंयाळां जासी
मोसा मत दे जूंना तरवर कूंपळ रा दिन कालै आसी।
लीलौ चैर फूलतौ फळतौ माटी जका पोखती आई
गाढ गाळ नै जड़ामूळ सूं वाइज वणसी अबै उदाई
डाळा सूख पांनड़ा झड़सी पवन जदै लूआं बण आसी
भोळा जोग बळीतै जितरौ जग री माया जग में बासी
गरब करै वो छोटौ बाजै प्रीत करणियौ बणै अकासी
नेहचौ कर रे बूढा बड़ला म्हारी जड़ां पंयाळां जासी
मोसा मत दे जूंना तरवर कूंपळ रा दिन कालै आसी।
