सोरा मुगी बसणिया दीर
थारी मोळी-मोळी सांसां में
लागै जाणै घोळ्योड़ो होवै
केवड़ो अर गुलाब
बळती-बळती आं लूवां में
थारो मांयलो मोसम ठंडो टीप
चालती रैवै ठंडी-ठंडी हील
जाणै पेट में
कूलर फिट करायोड़ो होवै।
अठीनै म्हारै पासै
पसीने में न्हावती देह
इण देही स्यूं
भट्टी नै लजावण हाळी
लाल-लाल लपटां
आसै पासै धूंवो धुंवासो।
आं सांसां में गरम-गरम
भाप तो है
फुव्वारा कठै।
माँयलै पासै
खदबदीजती हाँडी
कुण जाणै कद कुण
उघाड़दी ईं री ढ़कणी।
करदी लूवां नै चोफाळियाँ
आव आपां आपणै मोसम री
अदला बदली करां
मिंतर बणा।
म्हारै जिसै लोगां रो
मांयलो अर बारलो मोसम
एक सरीसो हीज होवै
गरमी में गरम
सरदी में ठंडी
थां लोगां रो मौयलो मोसम
बारलै मोसम स्यूं
मैळ कोनी राखै
थे इण वास्तै
गरमी में ठंडे अर
सरदी में गरम मोसम रा
मोताज रैवोला
छोड़ दोगलो पणो
चेरा मत ओढ़।
उतार थारा होकड़ा
चालणो है, तो
होजा म्हारै सागै।
