Quick Links

हाय, रोती में ई देखी कोयल बागां बोली

पपैयो मनैं हांस्यो चारस खेतां बोली

अकेली गेलो ताकूं छायां भी दूरी भागी

बैरण होळी आगी

भायेल्यां की पिचकार्‌या तीरां-सी मनैं लागै

म्हूं फागां कस्यां गाऊं जमा ना मन लागे

आंख्यां की नींदड़ली नैं नागण ओळूं खागी

बैरण होळी आगी

बरबूळ्या घणा चालै काजळ कस्यां पाड़ूं

निरखैगो कुण हाय, म्हूं बींदी कस्यां काढूं

बीछ्या ही पहर्‌या छा ठोकर म्हारे लागी

बैरण होली आगी

स्रोत
  • पोथी : राजस्थान के कवि ,
  • सिरजक : रघुराजसिंह हाड़ा ,
  • संपादक : अनिल गुप्ता ,
  • प्रकाशक : राजस्थानी भाषा साहित्य एवं संस्कृति अकादमी बीकानेर ,
  • संस्करण : तीसरा
जुड़्योड़ा विसै