बरत बड़कुलीया राखती
धान पीसती
पोटा थापती
गांव री लुगायां!
गाळ्यां, अबखायां
अर मौसा सैंवती
काळा आखर
भैंस दांई जाणती
गांव री लुगायां!
पगड़ी-टोपी देखती
घर आंवता लुक जांवती
मूं सीम्यां रैंवती
चूड़यां पै’रती-
गांव री लुगायां!
पास-पड़ोस जांवती
आपस मांय
लड़ांवती
करती गिंगरत कै करती राड़
गांव री लुगायां!
टाबरां नैं खिलावती
छोर्यां रा पट्टा बावती
कै सांसुवां बिसरांवती
गांव री लुगायां!
