ठुमक चाल मत चाल मंगेजण पलटै छिण-छिण छांवली
तूं गोरी बा सांवळी
ओ फागण सागण ही रैसी ओ सावण मन भावण रैसी
रुत आसी-जासी घिर आसी चांद-सूरज री जागण रैसी
उतरै लौ रंगड़ौ रंगरेजण ज्यूं सपना री झांवली
तूं गोरी बा सांवळी
तूं दरपण पर अरपण होसी तूं दिवला संग हिवलो ओसी
तूं फूलड़ा ज्यूं फूल-फूल हंस हिरमच होसी काजळ धोसी
होसी तूं बिन रूप गुमेजण ज्यूं कांकड़ री बांवळी
तू गोरी बा सांवळी
जे पायल सूं घायल करसी जे निजरां सूं डगरां भरसी
जे चूनड़ रै चांद चपेटै भंवता भोळा चकवा मरसी
तद तूं ही घुट मरै ऊमड़ री मत नीं चलै उतावळी
तूं गोरी बा सांवळी।
