तळै बिछ री हरियाळी दूब
बादळी ऊपर करयौ मंडाण
खेत में लेकर कसियौ हाथ
मिरगा नैण्यां करै निनाण।
पाय कर मनचायौ सो मेह
बाजरी खड़ी हरी कचनार
सोवणा बीच बीच में बूंट
घाल राख्या है मोठ-गुंवार।
रसीला हाथां रौ कसियौ
भरै रस पत्ता-पत्ता मांय
पसेवौ टपकै सारै डील
फिकर क्यूं अन-पांणी री नांय।
गावणै लागी दूहा-गीत
बोल पर चढ़णै लाग्या बोल
अगले दिन में के होसी
न इण रौ कोई नै ई तोल।
बीच में बाकी रह्यो निनाण
सूखणै लाग्या सारा खेत
चूंसणै लागी सारौ सार
तावड़ा सूं तप-तप नै रेत।
मुरझगौ खेतां सारी नाज
सूख नै पीळा पड़ेगा पांन
घास बिन मरगा ढांढ़ा-ढोर
टेक पण राखी ना भगवांन।
जा पड़या कसिया हाथां छूट
नैण जोवण लाग्या आकास
न दीख्यौ पण बदळियौ अेक
तूटगो बस सारी ई आस।
लावणी बणगौ फेर निनाण
न निकळै मूंडै में सूं बैण
भरयोड़ी बदळी ना बरसी
बरसणै लाग्या सूखा नैण।
