मेळो
नीं हुया करै
फकत मिनखां रो ईज
मेळो तो हुवै
वां स्सै निरजीव चीजां रो ई
जिकी नीकळै छोड़’र
खुदरो घर गांव
अर पूग ज्यावै मिलण नैं
मिनख जात सूं
अर बणै उणरी
हेताळू
कुंभारां री हाट माथै
मटकियां हांडियां अर
घड़ां रो मेळो
जिणानैं अेकटक जोवै ही
कनै ऊभी
चौसींगियां अर जेइयां
नैनकी दांतळियां ही
खंवां चढगी ही
चौसींगियां रै
कस्सियां ई झालियां हाथ
ताकै ही मेळो
इण आस में
कै आवै कोई
कमगरो किरसाण
अर झाल उणारो हाथ
ले ज्यावै खुदरै खेत
पीळै बादळ
अर फेरै उणानै
अेक-अेक ऊमरै
पछे लेवतां फारो
अर पीवतां राबड़ी
करै घण परसंसा
खुदरी घराळी सूं
इण नवी कस्सी री
इणी मेळै में बैठा हा
चींपिया अर संडासियां
ऊडीक में किणी हामिद री
जिको ले ज्यावै कोई चींपियो
अर मेटै पीड़
दादी रै हाथां री
अर करद्यै सकार
प्रेमचंद रै साहित नैं
चींपियै रै करुण भावा सूं आगै हो
रमतिया रो मेळो
इण मेळै में बैठा गुड्डा-गुड्डी
ऊडीकै हा
नैनकी बायां नैं
जिकी ले ज्यावै उणानैं
खुदरै घरां
अर राखै भाई बैन ज्यूं
करै घणा लाड
नित रा करावै सिनान
पैरावै नवा गाभा
अर बणावै केस
बाळ भावां रै इण मेळै में
नानकिया टाबरां सारू
आयोड़ी ही कैक
कारां अर टैक्टर ट्रोलियां
ऊडीक में किणीं ड्राइवर री
जिको भरै कस’र कूंची
अर तचकावै
खुदरै आंगणै में
रमतिया सूं आगै बैठी ही
सिणगार पेटियां
ऊडीक में
किणी सुहागभागण री
जिकी ल्यै ज्यावै आंनै
खुदरै घरां
अर सजावै काया
इणी मिस काच ई संभागियो सागै
बतावतां खुदनैं
सिणगार रो साथी
कनै ई मेळो देखै हा
आटलिया
लियां कांगसियां नैं गोदी
झट सूं बोलिया
म्हांरै बिना क्यांरो सिणगार
म्हे पण चालस्यां सागै
बातां ई बातां में भरीजगियो
कामणी रो थेलो
अर सबदां रो मेळो।
