बीं सियाळै हूं मास्को सूं बारै रैयो
पण जद कदे सैर में कोई काम हुयो
मनैं जद जावणो पड़तो जद ई जावतो
पाळै अर बरफ मांय कर अर पड़ती झड़ां।
हूं घणो बेगो थको घर सूं नीसरतो
जद सो कईं काळो-कुट्टु बारनै हुवतो
अर बनां री अंधारी मांयकर धमकतो
म्हारी चरमरावती अर चीखती चाल रै नीचै
अर ज्यूं ई हूं रेल्वाई रै फाटक कनैं पूगतो
जंगळी झाड़क्यां माथै निजर पड़ती।
अूपर तारा जगमगावता जिका ऊभर्योड़ा
सियाळै री रात रै ठंडै खाडै मांय
घणी बार, डाक अर अस्सी नंबर री गाडी
मनैं आखरी डब्बै रै फाटक सूं पकड़ लेवती
अर मनैं लारै छोडण खातर बगती जावती
पण हूं छैव अर च्यार नैं पकड़ लेवतो।
रोसनी रो झबूको, अेक घूमचक्कर, मोटो
इंजन छाकटी झुर्रयां पड़्योड़ो
बींरै माथै रो चानणो सगळै जोर में
सीट्यां मारतो बोळी पटड़्यां माथै,
गाडी रै कन्नैं रै निंवाच में,
जिकी खून री आस नैं पूरती।
हूं तो घणैमान निवतो, मनैं ई भूल जासूं
जाणै म्हारी मा रा बोबां सूं पैलपोत पीवतो
बोलो’ सोक हूं तो बैठसूं अर जाळ्यां मांय सूं
बीतै जुगां री अर लड़ाई री अर गरीबी री
ईं अनोखी कारीगरी नैं ओळखतो
रूस री सकल नैं।
अर, लड़तो बांनैं मूरतां में नईं गिणतो
हूं बांनैं सांत जोवूं अर आदरूं
लुगायां, भणनियां टाबरां रै सागै
कमतरिया, कारीगर अर ओर घणा ई
हुकम रा सैनाणां सूं बिदरंग नईं,
भूख रो अर चावना रो जूवो लियां,
नुंवा दुखड़ा, नुंवी परखां अर नुंवी दिसावां
बै झेलै हा धरती रा मालकां ज्यूं।
पोथ्यां रै चिप्योड़ा, नौजवान
अर टाबर पानां माथै पाना पलटता
न्यारी-न्यारी रीत सूं अळूझ्या
जाणै घोड़ां री गाडी में लोगां री भीड़
म्हे मास्को पूग्यो ज्यू-ज्यू अंधारो
आसै-पासै पसरी चांदी में घुळतो गयो
चांदी जिकी ऊखा सूं नीसरी ही
ईं मोटै सै’र री जमींतळ री रेल सूं
आगली पीढ्यां फाटक माथै जमा हुयगी
रस्तै माथै चारूंमेर बिखेरती
नुंवी उबटण री सुगन फूलां री सोरम
अर मसालां री भापां सैत री रोट्यां।
हरेक बात में हूं समझणो चावूं
मूळ में कईं है।
रोजीनै री भावण, रोजीनै रै काम,
भावना कई
बीती बातां रा सार साधतां
पैलपोत री नींवां
तंत, जड़ां अर मांयली हियै री
बात रो खुलासो;
भाग री बणगत में अमूझ्योड़ो
हालचाल जोवणियो,
जीवतो, समझतो, हेत अर ध्यान करतो
अर सोध करणियो।
अरे, जे म्हारी चतराई सूं ई सरतो
इण रीत में,
तो आठ ओळ्यां में हूं घड़ नाखतो
वासना रा टुकड़ा।
लिखतो हूं पापां री, बरज्योड़ै फळ री
मौको पकड़ती छायां री बात
अूतावळी उडाण नैं अर ताती दोड़ नैं
हथाळ्यां अर अखूण्यां नैं।
ईंरा कायदां रो अरथ अर जलम
न्याव री टीपण्यां में,
नांव जिका रोसन हुया, उथळतो
अर बारां बखाण करतो।
म्हारी नसां खींचीजै कविता नैं रूप देतां
जाणै बाग री कलम करी हुवै
नींबूं रा गाछ फळता रैवै नीचली गळी में
दोवड़ै घेरै में
म्हारी कविता ताजी रेळियै री पांतां में सांस लेवै
गुलाबां अर कुंजां में
पोदीनै अर नुंवी घास रै मांय
गाजां री गमकां में।
ज्यूं शॉपिन अेकर आपरी रागण्यां में
अनोखो मेळ करायो
बागां, कुंजां कबरां अर रोयां रो—
अेक जीवतो इचरज।
फळीजती घड़यां झालतो
रमत अर पीड़ रै बिच में
गावती धनसडोर री धूजती गत में
जबरो तीर निंवतो।
