झांझरकै उठने
मीठी मुळकाण साथ
टिकड़ सेकै
धणी अर टाबरां रा
भाता तैयार कर
व्हीर हुवै कमावण
मजदूर री धरियाणी
बस मांय ऊभी
असलील हरकतां सेवती
लोगां री
हवसभरी निजरां ने
निजरां सूं काटे
कोई धणी सागै
कोई अेकली
आपणैं धंधे जावै
रोज कई नाग आडा फिरे
फुंफकारे
कदैई कंस कदैई रावण
तरै-तरै रे मिनख मांय
चोखा मिनख ई
भैळा मिल'र साथ निभावै।
गोद रै बच्चिये री
किलकारी सुणनै थकान नै
आंचळ मांय समेट
आपणी बायां रो
कवच देवती
अन्नपूरणा बण
बच्चियां री
आंख्यां मांय नींद उडैळ
पसीना सूं तरबतर
काम करती रैवै
ढ़ोवै है गारै री तगारी
तोड़े है भाटा
गरमी-सरदी में धूजती
जी तोड़ मैनत कर
सिंझया पाछी घरै आयनै
बच्चियां नै भूख सूं
बलबिलावतां देख
रोट-साग बणांवण जुटै
दो कौर मुहया करावै
धणीं दारू पी
घरै आवै
दो चार जूता खाय
पत्नी धर्म निभावै
सासू सुसरा रो ई
चाय पाणी, दवा-दारू
रोटी जुटावै
चौक मांय चूल्हो फूंकती
भरी जवानी मांय
माथै मातै चांदी चमके
चैरौ ताम्बै ज्यूं लाल भभूकौ
धणीं नै दारू खातर
पइसा थमाती
देखती
आपरो लूटतौ बजट
दो चार आंसूं
लुगड़ा नै पावै।
