धरती रा थांभा कद धसकै, उल्ट्यो आभो कद आसी?

माता अब तो सांझ पड़ी है, रूस्यो दिन कद उग आसी?

हाथां रा होदा कद टूटै, घोड़ां नै कद धमकास्यूं।

मूंछ्यां म्हारी कद बट खावै, खांडा नै कद खड़कास्यूं।

सूना पड़ग्या भुज म्हारा अे, अरियां नै कद जरकासी॥

माता अब तो सांझ पड़ी है, रूस्यो दिन कद उग आसी?

म्हारै जीतां धरती लेग्या, चाकर आज धणी बणग्या,

दोखीड़ां रै दुख सूं म्हारै, अन्तै में छाळा पड़ग्या।

आंसू झरती आंखड़ल्यां में, राता डोरा कद आसी॥

माता अब तो सांझ पड़ी है, रूस्यो दिन कद उग आसी?

गाठी म्हारी जीभ सुमरतां, कान हुया बोळा थारै,

दिन पळ्ट्यो जद मायड़ पळ्टी, बेटां नै कुण बुचकारै।

मां थारो तिरसूळ चलै कद, राकसड़ा कद अरड़ासी॥

माता अब तो सांझ पड़ी है, रूस्यो दिन कद उग आसी?

थारै तो लाखों बेटा है, म्हारी मायड़ इक रहसी,

हूं कपूत जायो हूं थारै, थनै कुमाता कुण कहसी।

अब तो थारी पत जावै है, बाघ चढ्यां तूं कद आसी ॥

माता अब तो सांझ पड़ी है, रूस्यो दिन कद उग आसी?

स्रोत
  • पोथी : झणकार ,
  • सिरजक : तनसिंंह ,
  • संपादक : महावीर सिंह सरवड़ी ,
  • प्रकाशक : श्री क्षत्रिय युवक संघ
जुड़्योड़ा विसै