कीं कोनी बदळियो
इण जनतंतर में
ठाकर बदळिया है फगत।
जकी जमीन
म्हारा पुरखां राखी
घर री लुगायां रा गैहणां
अडाणै राख’र
आज
गांव रो पटवारी कैयग्यौ
तीस दिन मांय
तहसील में आय’र
जमीन सरकार नै सूंपणी है
सरकार देवैला मुआवजो।
सरकार देय दी है
म्हारै पुरखां री जमीन
म्हारै पुरखां री मरजाद
एक परदेसी कम्पनी नैं।
म्हैं कांई जवाब देवूंला
म्हारी आवण वाळी पीढ़ियां नैं।
बे पूछैला थे कियां दे दी जमीन
जिण माथै हक म्हारो हो,
सरकार रो कोनी।
जद आज सोचूं
राजतंतर अर जनतंतर में कांई फरक है?
