कुर्सी मिली कमाल हो गयो।
मल्लू मोहनलाल हो गयो।
भुरतै वाळो काळो बैंगण
देख टमाटर लाल हो गयो।
सीकर की सड़कां सो चैरो
हेमा जी को ग़ाल हो गयो।
ही जद तो हालत खस्ता ही
इब तो मालामाल हो गयो।
पैली हो ‘भूख की ढाणी’
आज शहर भोपाल हो गयो।
जनता होळी को बड़कुल्लो
लेकिन तंत्र गुलाल हो गयो।
सारो मुल्क मर्सिया पढर्यो।
मोहन मगर धमाल हो गयो।
हिदोस्तां कै लोकतंत्र को
जग में ऊंचो भाल हो गयो।
कुर्सी मिली कमाल हो गयो।
मल्लू मोहनलाल हो गयो।
