म्हैं नीं समझूं अरथ
'राम-नाम जपणा
पराया माल अपणा'
म्हैं नी पसारूं पगां नै
गूदड़ी सूं बारणे,
ठंड सूं बचतौ
गेलै आवूं
गेलै जावूं
सत-नियम
मिनख-मरजाद निभावूं
म्हैं अभावां री
जियाजूण री खैचळ करतौ
फाटोड़ा गाभां नै
बार-बार सींवतौ
संतोस री सीळी वायरी
कोनी मैसूस कर पावूं
जरूरतां री चीजां
कठा तूं, किस्तरै मोलावूं?
पण, फेर भी
उतारणी पडसी
अभावां री फाट्योड़ी गूदड़ी
वो दिन—
स्हैन करणै री हदां नै तोडणै रौ
आखिरी दिन होसी
खतरां सूं खेलणौ पड़ैगा
नंवा मारग खोलणा है तो
दरद झेलणौ पड़ैगा।
