थूं शंकर रै शीश पर
रूड़ो करतो राज
किम मिमखां रा पगलिया
थां पर आज पड़ग्या आज?
रुळता फिरै चकोर
कमोदणी कुम्हळायगी
चलै'न किणरोई जोर!
थूं दरिया रो दीकरो
जबरी थारी जात
मिनखां आगै हारग्यो
आ इचरज री बात!
थूं इमरत री खाण है
इण में मीन न मेख
म्हारै खातर मेलजे
इमरत बोतल अेक!
म्हे धरती रा मानवी
थूं सुरागां रो देव
अमरापुर में पूगणो
म्हारी जूनी टेव!
नह थे अहल्या नै ठगी
नह गौतम दीधो स्राप
मरदां आज मेटाविया
थारा सगळाई पाप!
जुग-जुग सूं नह जांणियो
थारो अबखो ढंग
सेवट भेद उघाड़ियो
रंग मानखा रंग!
'आर्म स्ट्रांग' धरती बसै
चंदा बसै अकास
जिणरी जिण सूं दोस्ती
वो ईज उणरै पास।
पोल अपोलो खोलदी
चंदा थारी आज
तो ई चमचम चमकतां
आवै थनै न लाज!
मामा अर भाणेज रो
सगपण जूनो जाण
मन में रीस न आणजे
इतरी पाळै काण।
