पीछो ढाळ'र कातण बैठूं,
रूई मेल’र पास।
खूब घुमाऊं नानो कातूं,
जद जद मिलै उकास।
चाल म्हारा चरखा घर रर घर।
चाल म्हारा चरखा घर रर घर।
अेक दिवस रे कूकड़ियां स्यूं,
छाबड़ियो भर ज्याय।
सासू म्हारी देखै फुड़ती,
घणी घणी हरखाय।
चाल म्हारा चरखा घर रर घर।
चाल म्हारा चरखा घर रर घर।
उनाळै बरसाळै दिनड़ा,
लामा लामा पाय।
सूत चार महीनां मैं कातूं,
बड़ो ढेर हो ज्याय।
चाल म्हारा चरखा घर रर घर।
चाल म्हारा चरखा घर रर घर।
खादी खेस दरी बणवावां,
और बोळी निवार।
मुकळाई रा गाबा होवै,
पिलंग बणै दो चार।
चाल म्हारा चरखा घर रर घर।
चाल म्हारा चरखा घर रर घर।
