दपूजो टोरती बगत
म्हैं नीं सोच्यो हो
थे इण ढाळै भांडसो
अर सीधी सी’क बात नै
बांकिज्योड़ै फूटै सूं कर देसो
नाप-नाप’र ठौड़-ठौड़ सूं
इत्ती लम्बी अर इत्ती बांकी।
काल रै दिन
म्हैं ई तोड़’र घड़ूंला
नूवां बारी-बांडा
तावड़ै में खटवी खावतो आज
परबारो चाल’र
थारै बगस्योड़ी
आंधी अर अंधेर रा
करणा सीखूं हूं-जापता।
इणीज खातर तो-
म्हैं कर दी है टाळ
थारी नुगराई हेठै दपूजै री
अर भाई ज
थारी सीवां नै करूं हूं-
खुणियां लांई सलाम!
भाई जी सलाम!!
