रंग नीं, कोई रूप नीं बहरूपौ भंवरा
जगत हँसै थनै देख नैं, ऐङो थूं भंवरा
मिरगां नैंणी, रूपाळी, कर गई ऐङो वार
बिरह में जल काळो हुयो, ऐहो हुयो मितरां
कदैई थूँ इण फूल पर, कदैई थूं उण फूल पर
फूल-फूल क्यूं डोलै थूं, बागां में भंवरा
अेक सूं सुन्दर अेक फूल, गेंदा और गुलाब
जूही, चमेली, मोगरा म्हारा मन मोहे मितरां
भंव-भंव क्यूं करतो फिरै, बागां में भंवरा
फूलां सूं गपसप कांई करै, कांई तूं भंवरा
म्हैं तो सराहूं फूलां रौ रंग, रूप, खुशबू
कैङी प्यारी प्यारी है, वाणी सुगंध मितरां
रूप रा लोभी, रस-लपंट, हरजाई भंवरा
हर कीनै तूं चूमै, फिरै ऐङो क्यूं भंवरा
लोगां कैवै रब मिळै, जोवण सूं मितरां
म्हैं जोऊं अेक साथीङो, बागां में मितरां
साथीङो हिरदै बसै, वन मा भटकै कांई
सांचै मन सुमिरण करै, मीर मिळै भंवरा
लैला जोवै मजनूं नै, सींरी नै फरहाद
पांव में छाला पङ गया, ना मन मानै मितरां
फूल नहीं तौ कांई करै, बागां में भंवरा
सूखी डाळी लिपट नै, कांई करै भंवरा
प्रीत निभावण म्हैं फिरूं, बागां में मितरां
आज नहीं तौ काल ही खिलसी फूल मितरां
रावळा घोङा बावळा सवार, मंजिल कैयां पाय
दोनूं आप री मौज में, दौङ रिया भंवरा
दौङियां ही मंजिल मिलै, भली हो कछवा चाल
निकम्मां नै कांई मिळै, थूं ही बता मितरां
थूं तो बावळौ होई गयो, उण रै मिस भंवरा
हिरण जोवै कस्तूरी, बीं नै तूं मितरां
अखियां में मूरत बसी, मन में उण री याद
मनङो क्यूं – किकर उदास, ना जाणूं मितरां।
