मिळ्यो आज जद आसा सूं म्हैं
रोवण लागी झरणै-भांत
आस पुराऊं अठै म्हैं किंण री
मारै जीवण नैं कर-कर घात...।
कर रैया हींण चरित छोर्यां रो
आंख्यां मावां री फोड़ै है
छीण रैया बायां री राखी
परणी आस चिल्लाटै है...॥
आसा कूकै कर्यो प्रेम म्हैं
वैर किंणी सूं नीं राख्यो
घोर अणूती राज री चाल्यां
आस जीवण री क्यूं राखो...?
कैंवती जावै भर-भर डसका
हुऊं दुखी म्हैं अबै घणीं
मिनखापो जद मोख्यां बैवण लागै
किणरी पंचायत कुण-धणी...?
रोटी-पाणी अर दवा-दारू रो
भोग रैया पग-पग फोड़ो
आसा-आसा में जुग बिताया
मरै घात सूं जीवण घणों...॥
आसा री डांगड़ी पकड़ आसिया
धीरज दरावै जीवण तनै
आंधी आसा पड़ नीं जावै
अबै लाग रैयो डर म्हानै...॥
