आंतां रा घेर सूं बंध्यो
गांव सूं स्हैर आयो बाप
अणचाहो मेहमाण
अपणां री आंख्यां रिड़कै।
हाथ री लाठी
देसी पहनावो
उठणूं-बैठणूं सै
बेटा-बहू नै अखरै।
कुड़ता री बगली
कौडी भर झलकती आंख’क
मोटी-मोटी आंख्यां
कुढ़ती बहू री।
वां रै मन तुफान
क रूळ जासी ईं तरां
बंगला री इज्जत
ऑफिस-कॉलोनी मूं।
बूढी आंख्यां निरखै-परखै
कै सै उत्तर-पातर
बरफ री तरां गळतो वजूद
अपणै ई घर में।
अल-सुबै बूढ़ो बाप
चल दियो मिजमान सो
लकुटि टेकतो
अपणै गाँव कानी।
