उठै धमीड़ा अंबर चीर नै
अैरण बूझै रै घण बीर नै
बीरा रै बीरा धवणी खीरा क्यूं जगाया
खीरा में टुकडा बीजळसार रा तपडाया
डामै क्यूं म्हारी काया, प्राणा नै दाझै क्यूं रै
क्यूं तो कूटै रै लोह सरीर नै
अैरण बूझै रै घण बीर नै
मिनखा न बांधण मिनखा सांकळा घडाई
हाथा हथकड़ियां, पग री बेड़ियां बणाई
मिनखा नै नीचे दाब्या आंकस परवाणै र
आपां क्यूं सिरजां जुगरी पीड़ नै
अरण बूझ रै घण बीर नै
तीखी धारां री खागा, अणिया रा भाला
लोई सू रंगदी धरती, दोय हाथ वाळा
सह्या नहीं जावै सामी छाती अै भचीड़ रै
क्यूं तो घड़ देवां आपां तीर नै
अैरण बूझै रै घण बीर नै
घड़णो व्है घड़ रै बीरा, कसिया कुदाळी
अन धन निपजावै कमधज, हाथां हळबाळी
टाबर रै हाथा माही बाजै खुणखुणिया रै
क्यूं नीं पूंछां नैणां रा नीर नै
अैरण बूझै र धण बीर नै
टांकी घड़, जीवण री जे मेडिया चिणाव
जीवण रै रथ री गत नै धुराई बधाव
सूई सींवै जीवण रा फाट्या गूदड़ा रै
क्यूं नीं बदळै जुग री तसवीर नै
अैरण बूझै रै धण बीर नै।
