थारी निजरां रो कांई
झील रो ठहराव झळकै
दोय नांनी—नांनी नाव
ओपती आंसुवां री धार
इणनै नदियां रो बहाव लिखूं?
तीखा तीर—कमान सरीखी
ऊभी खेजड़ी फळदार निरख
उंडी धसियोड़ी आंख्यां नै
इण जुगती रो सार लिखूं।
गूंदा, कैर—कुमठियां, सांगरी
उड़ता पाखी री ऊंची आस
मद भरिया दोय प्याला नैं
रातां बैरां री मिठास लिखूं।
चांद—सूरज री सोभा फीकी
टिमरख तारां री उजास निरख
दीयां री जळती बाती नै
अंधियारां सूं लड़ता ख्वाब लिखूं।
गीतां री लड़ियां मल्हार गावै
मधुमास री रिमझिम फुहार नै
आंख्यां री अणूती उडीक
साजण सजनी रो प्यार लिखूं।
