डागळिए चढ सोन चिड़कली चै’कण लागी रै।
कंवली काया स्यूं कसतूरी मै’कण लागी रै॥
धर मजलां धर कूचां कढगी
देख बेलड़ी अंबर चढगी
काचा नाळ उळझता तंतू
फैलाती—फैलाती बढगी
अळियां गळियां, चौक, पोळ, आंगणिएं छागी रै।
कंवळी काया स्यूं कसतूरी मैं’कण लागी रै॥
लुक छिप उडता पंछी झांकै
हरियल सूवटिया नित ताकै
भंवरा भाट खुसामदगारा
बिदड़ावै बेजां हीं हांकै
रैण बटेऊ, रूप चोरटो चाँद लुभागी रै।
कंवळी काया स्यूं कसतूरी मै’कण लागी रै॥
मन री भेद भर्योड़ी बातां
रुकज्या अधरां आतां—आतां
सुगणां सुपणां, गै’री रातां
आंखड़ल्यां लाजै बतळातां
कुछ कै’ती कुछ कैज्या गजबण, बै’कण लागी रै।
कंवळी काया स्यूं कसतूरी मै’कण लागी रै॥
जोबन मांय न डील समावै
कसता कसणा टूट्या जावै
उनमादण पुरवाई आवै
तन बाळै हिवड़ो हुळसावै
तपतै धोरां री ज्यूं काया दहकण लागी रै।
कंवळी काया स्यूं कसतूरी मै’कण लागी रै॥
