आओ बेलियां पेच लड़ावां
बै मारया बै काट्या गावां
ऊंची मैड़ी चढां अटारी
चरखी डोर पतंग उधारी
बाळ परो परदेसी मांझो
हाथ सुंताई रील सुधारी
पंछी पंथी खैर मनावां
आओ बेलियां पेच लड़ावां
उडती पतंग अकासां जासी
कटतां पाण धरा आ जासी
हवा आपरै बस कर लेसी
डोरो छूट तिंवाळा खासी
भरां उडारी गोत लगावां
आओ बेलियां पेच लड़ावां
काणे-काण राखजै मतना
ढील अणूती दीजै मतना
डोर हाथ में साध राखजै
घणी गुचळकी भरजै मतना
सर-सर सरणाट मचावां
आओ बेलियां पतंग उड़ावां।
