वाह सा! वाह सा!
आप तो आप सा!
कैवणौ कांई आप रौ
कांई आप री बात सा!
देस देस कूंट कूंट
चेलकिया है आप रा
फेरै माळा आप री ई
करै आपरौ जाप सा!
जिग्यां जिग्यां फिरौ हांडता
जीमणै रा नूंता खातर
बरस बीतग्या जीमतां
फेरूं ई नीं धाप सा!
जोर किणी रौ चालै कोनीं
करै तो करै कांई
आपरी ई गोझी में है
हर पग रौ नाप सा!
लोग घणा ई तड़फा तोड़ै
आठूं पौर माथौ फोड़ै
पण छूटै धूजणी सामीं
आप सबद री खाप सा!
पूग सकै नीं कोई आप नै
नसां सगळी आप कन्नै
जोड़-तोड़ री राजनीति में
आप सगळां रा बाप सा!
