अबै, लेनिन रै जलमदिन माथै
हूं चींतूं उणनैं हर घड़ी,
रोजीनै री खबरां मांय झांकतो,
हूं चींतूं उणनैं,
दिनूगे रोटी रो गास तोड़तां,
हूं चींतूं उणनैं,
बाई नैं म्हारी पोसवाळ मेलतां,
हूं चींतूं उणनैं;
अर, धंधै में म्हारै न्हासतां
हूं चींतूं उणनैं;
अर, ‘जैट’ जाज री गाज नैं सुणतां
सै’र रै भूरै अकासां मांय कर,
अर, नुंवी मंजलां घरां री जोवतां,
परवार लियां बिस्तर बोरिया
‘लोड’ भर्यां दबती चालतां,
बूजी रा गमला हालै हिलता
हरिया पान धजा ज्यूं उडता,
हूं चीतूं उणनैं;
हूं चींतूं उणनैं
जद कदे थमूं
मिनखां नैं दुकान माथै बतळावूं;
हूं चींतूं उणनैं
जद पड़ोसी रामासामा करै
अैक दूजै ने गळी में भेटै
अर कैवै रूत सुवावणी है!
हूं चीतूं उणनैं
जद सुणूं रेडियो माथै
नामी रागणी नैं
हूं चींतूं उणनैं
जद म्हारी मेज माथै
कोरा पाना नैं भेळा करतो, जिंयां हूं डूबूं
आवणिया दिनां रा सपना में
हूं चींतूं उणनैं।
