प्राथमिक स्तर सूं जरूरी होवणी चाइजै
मीठेश निरमोही : सबसूं पैली तौ म्हैं आपनै बधाई देवूं 'क आप केन्द्रीय साहित अकादमी (नई दिल्ली) रै राजस्थानी विभाग रा संयोजक मनोनीत हुया हौ!
रावत सारस्वत : बड़ी किरपा है सा आपरी।
मीठेश निरमोही : केन्द्रीय साहित अकादमी रै राजस्थानी विभाग रा संयोजक बणियां पछै आप कैड़ौ अनुभव कर रैया हौ?
रावत सारस्वत : म्हनै खुसी री बजाय अेक बड़ी जिम्मेवारी रौ अेहसास हो रैयौ है अर ई बोझ सूं म्हैं अपणै आपनै दबियोड़ौ महसूस करूं, क्यूं 'क म्हनै बड़ौ डर लाग रैयौ है 'क म्हैं आ जिम्मेवारी निभा संकूला, के नीं निभा सकूंला।
मीठेश निरमोही : तौ आप इण जिम्मेवारी नै किण तरै निभासौ?
रावत सारस्वत : अैंमें स्थितियां यां है 'क संयोजक रा दो काम हुया करै। अेक तौ वौ सलाहकार बोर्ड नै ‘कनविन्स’ करै। दूजौ वौ ‘अेक्जीक्यूटिव’ में ‘रिप्रजेन्ट’ करै। जठै तक ‘अेक्जीकिटिव’ में ‘रिप्रजेन्ट’ करणै रौ सुवाल है, बठै तक तौ म्हैं भारतीय भाषावां रै विद्वानां नै साथै लेय’र राजस्थानी रै ‘कॉज’ माथै जोर देवूंलौ। अर सलाहकार बोर्ड में जिका भी साथी है, वारै सगळां रै सहयोग सूं अच्छौ साहित अर अच्छी पुस्तकां सामी आवै—अैड़ा जतन करसूं।
मीठेश निरमोही : लारला संयोजक श्री माहेश्वरीजी भी तौ इण तरै रा जतन करिया हुवैला?
रावत सारस्वत : हां, वै तौ बहुत ही बढ़िया जतन करिया है। वां रौ मुकाबलौ तौ स्यात् म्हैं कर भी नीं सकूंला।
मीठेश निरमोही : राजस्थानी भाषा-साहित रै विकास खातिर आपरी कांई योजना रैसी?
रावत सारस्वत : अकादमी री पॉलिसीज रै तै'त राजस्थानी भाषा साहित री जिण विधावां में पोथ्यां नीं आयी है, वांनै सिमरथ संपादक-साहितकारां सूं संपादन करवाय’र छपासां। राजस्थानी भासा सूं भारतीय भाषावां अर भारतीय भाषावां सूं राजस्थानी भाषा में श्रेष्ठ साहित रौ अनुवाद करावण री कोसिस करस्यूं। वै सगळा जतन करस्यूं—जिकौ राजस्थानी भाषा साहित्य नै समकालीन भारतीय भाषावां रै साहित रै बीचै प्रतिष्ठा दिलाय सकै।
मीठेश निरमोही : केन्द्रीय अकादमी में आज राजस्थानी री कांई स्थिति है?
रावत सारस्वत : वा नुंवी भाषावां मांय सूं अेक है। बियां जूनी भाषावां को दरजौ दूसरौ है। यूं वै तौ केहवै 'क म्हारै (केन्द्रीय साहित अकादमी) वास्तै सै भाषावां बराबर है। पण म्हारी दीठ में जिण भाषावां नै संवैधानिक मानता है, वां जूनी भाषावां सूं मुकाबलौ नीं है। बठै री प्रकासण योजनावां में भी राजस्थानी नै कम पृष्ठ अर कम ई प्रविष्टियां मिलै। इणनै बढ़ावण रा जतन करिया है म्है।
मीठेश निरमोही : यानी आपनै लाग रैयौ है 'क आज केन्द्रीय साहित अकादमी में दूजी भारतीय भाषावां री तुलना में राजस्थानी री उपेक्षा हुय रैयी है?
रावत सारस्वत : वै तौ केहवै है 'क म्हारै वास्तै सै बराबर है, लेकिन वठै अपांरौ प्रकासित साहित जिकौ है, वौ दूजी भारतीय भाषावां रै मुकाबलै में भौत कम है। राजस्थानी साहित रै प्रकासण सारू अेक ‘फिक्स’ कोटौ हुवणौ चाइजै। चायै अकादमी री समकालीन भारतीय साहित पत्रिका व्हौ 'क दूजा प्रकासण। साहित-प्रकासण में भेद नीं हुवणा चाइजै, आपां रौ हक आपांनै मिळै—आपां नै अैड़ा जतन करणा चाइजै। अकादमी नै ज्ञापन भेजणा चाइजै। संयोजक रै नातै म्हैं भी औ सवाल उठास्यूं।
मीठेश निरमोही : साहित अकादमियां, जिणमें केन्द्रीय अर क्षेत्रीय अकादमियां भेळी है—कांनी सूं दिरीजण आळै पुरस्कारां बाबत आपरी टिप्पणी?
रावत सारस्वत : औ तौ बड़ौ नाजुक सवाल करियौ है आप, इणमें तौ आदमी पर आस्था रौ सवाल है। जिकौ सभापति के अध्यक्ष पवित्र है, बेदाग-बेलाग ढंग सूं काम करै तौ दिक्कत नीं है। नींतर आप जाणौ ई हौ... जद ई तौ अैड़ा सवाल उठै। दूसरा जिका पुरस्कार रा जज है नीं, वांरी कमी है।
‘जजमेंट’ में ई मित्रता निभावण री कोसिस करै। म्हैं इसा ‘इंसटेन्स’ भौत देख्या है। जदैई तौ आगै जाय’र बदनामी हुवै। पुरस्कारां री साख गिरै। पण जठै तक साहित अकादमी (नई दिल्ली) रौ सवाल है अठै की बजाय बढिया है।
मीठेश निरमोही : आधुनिक साहित रा लिखारां बाबत आपरा विचार?
रावत सारस्वत : निबंध तौ हाल राजस्थानी में खास लिखीज्या ई कोनीं। लेख लिखण में जहूरखां जी मेहर टणका है। कथा रै ‘टंच’ में म्हैं बौत कम रह्यौ हूं, दूसरौ पुराणी पीढी रै लोगां नै तौ म्हैं जाणूं करूं हूं, वै आपरै ढंग सूं लिखै। वां लोगां रा अलग-अलग ‘कन्ट्रीब्यूशन’ है। कथा-लेखण तौ ‘सो-सो’ है, खास गिणावण जोग नांव हाल कोनीं।
मीठेश निरमोही : कविता में?
रावत सारस्वत : कवियां री अलग-अलग विशेषतावां है। जियां कन्हैयालाल जी सेठिया लिखी है, बां री कवितावां बां रै आपरै ढंग री कवितावां है। कीं रचनावां ठीक भी है—प्रकृति-वर्णन अर भाषा-प्रेम री कवितावां। सत्यप्रकाशजी जोशी लोकगीतां री शब्दावळी नै भौत बढिया पचाई है। बड़ी मधुर शब्दावळी है वां री। अर असल में वै ‘रोमैंटिक पोइट’ भी है। लोग जिका ‘प्रोग्रेसिव’ वगैरा वां नै मानै—म्हैं वां रै पक्ष में कोयनीं। मूळ में वां री कविता में ‘रोमांस’ है।
मीठेश निरमोही : नुंवा कवियां में?
रावत सारस्वत : नुंवी कविता रै बारै में म्हारा विचार दूसरा है। म्हनै महसूस हुवै कविता विचार दूसरा है। म्हनै महसूस हुवै-कविता अर विचार में कोई तारतम्य कोई नीं लाधै। जो कैवै क खंड बिम्ब है जे खंड बिम्ब है तौ सा, पूरा बिम्ब क्यूं कोयनीं? फेर भी या है क जो बै लिखै है जिकौ जुडै ई कोयनीं। अेक बात कैय दी, फेर दूसरी बात कैय दी। केई बार इसी बात कैय दी क बोध गम्य ई नीं हुयी। म्हैं केई लोगां सूं पूछियौ वै कैवै क सा, औ ‘जनरेशन गैप’ है।
मीठेश निरमोही : अबार री स्थितियां नै देखतां थकां राजस्थानी भाषा री संवैधानिक मानता खातिर किण तरै रा जतन हुवणा चाइजै?
रावत सारस्वत : म्हारौ तौ खयाल है क रचनावां बेसी हुवणी चाइजै। खाली कोई हल्लौ करणै सूं तौ मानता मिलै नीं। अर मानलां मिलगी भी तौ आपां कन्नै के है? आज तौ सवाल है क पाठ्य-पुस्तकां भी कठै? जरूरत तौ है इज। बस साहित सिरजण हुवणौ चाइजै।
मीठेश निरमोही : साहित सिरजण तौ अेक पलड़ै री बात है!
रावत सारस्वत : सिरजण बौत जरूरी है।
मीठेश निरमोही : किणी तरै रै जन आन्दोलनां री जरूरत कोयनीं?
रावत सारस्वत : म्हारौ खयाल है आन्दोलनां खातिर तौ अठारा लोग तैयार कोयनीं। औ बड़ौ ‘डेलीकेट’ सवाल है। जठै अेक तरफ भारतीय, भाषावां री अेकता, संस्कृति री अेकता उठै नीं बठै आपरै प्रश्न नै लोग दूसरै ढंग सूं लेसी। आंध्र में अेक तेलुगु हौ जिकौ आपरी मातृभाषा खातर आत्मदाह कर लियौ। आपां रै अठै कुण है जिकौ आत्मदाह करसी। जद कोई आत्मदाह रै खातिर तैयार हुय जासी आमां नै आपौआप मानता मिळ जासी। लारलै बरसां री बात, कन्नड़ खातिर गौकाक साहब अर वारां साथी जबरदस्त आन्दोलन करियौ है।
मीठेश निरमोही : भाषा री मानता खातिर अैड़ा आन्दोलन जरूरी है?
रावत सारस्वत : हां, अैंड़ा आन्दोलन भी अेक सबळ पक्ष हुवै है। पण बौत ही ‘सोबर’ ढंग सूं हुवणा चाइजै। आन्दोलन सेहरां तांईं सीमित नीं हुवै। गांव तांई पूगणौ चाइजै। भाषा री संवैधानिक मानता रै सवाल नै चुणाव रौ प्रश्न बणाय लेवां तौ आपां नै सफलता मिळ सकै।
मीठेश निरमोही : राष्ट्रभाषा हिन्दी समर्थकां सूं राजस्थानी हित में आप कांई उम्मीद राखौ?
रावत सारस्वत : राष्ट्रभाषा हिन्दी रै समर्थकां री आ गळत धारणा है क राष्ट्रीय अेकता में राजस्थानी बाधक है। जद गुजराती, मराठी, बंगाली, पंजाबी, कन्नड़, तमिल, तेलुगु अर दूजी-दूजी भारतीय भाषावां री संवैधानिक मानता सूं फरक नीं पड़ै। तौ राजस्थानी सूं कद पड़ जासी? कीं स्वार्थी लोगां रा स्वार्थ है। जिकांरी पुस्तकां इण प्रदेस में बिकै, पाठ्यक्रमां में लाग्योड़ी है, आं लोगां री बजै सूं औ सै विरोध है। म्हैं आ नीं मानूं क हिन्दी संसार जिकौ व्यापक रूप में है बौ आ ‘पोलीसीज’ राखै। हिन्दी का कुछ गुट है वै आपरै स्वार्थ री पूर्ति सारू इण तरै रा ‘स्टंट’ करै। इणरै अलावा भी आपरी सरकार रै सचिवालय में ही राजस्थानी रा प्रबल विरोधी है जिका मूळ रूप सूं राजस्थान सूं बारै रा है बै अठै री रोटी तौ जीमै पण राजस्थानी रौ विरोध करै। अै लोग अठै बैठा बैठा केन्द्रीय साहित अकादमी में भी राजस्थानी प्रतिनिधि रै रूप में हिन्दी आळै नै ‘रिकमण्ड’ कर देवै। आं सूं सचेत रैणौ जरूरी है।
मीठेश निरमोही : केन्द्रीय साहित अकादमी रै राजस्थानी पुरस्कारां रा घणकरा ‘जज’ हिन्दी आळा है?
रावत सारस्वत : म्हनै भी बड़ौ ताजुब है। म्हैं आपरी संयोजकीय भूमिका निभावतां थकां आं नै बदळास्यूं। राजस्थानी नीं समझै वांनै औ पवित्र ‘जजमेंट’ करणै को हक कोयनीं।
मीठेश निरमोही : राजस्थानी फिलमां बाबत आपरा कांई विचार है?
रावत सारस्वत : अबार निरासाजनक स्थिति है। अेक तौ यारी क फिलमां को निरमाण इसा लोगां रै हाथ में है जिका राजस्थानी संस्कृति सूं भी परिचित कोयनी। फिलमां में आपां रै लोगां द्वारा ई जिण तरै आपां री संस्कृति नै भ्रष्ट कर’र पेस करियौ जा रैयौ है, घणै दुख री बात है। दरसकां रै ‘टेस्ट’ नै सरूआत में ई जे बिगाड़ देवांगा तौ पछै कांई हुसी, अंदाजौ नीं लगायौ जा सकै। फिलमां रै लेखकां अर गीतकारां नै सोबरपणै सूं डायलॉग अर गीत लिखणा चाइजै। आपां री संस्कृति बेजोड़ है, वीं नै प्रदर्शित करण री जरूरत है। हिन्दी फिलमां में जिण तरै री ‘चीपनेस’ राजस्थानी फिलमां में आय रैयी है घणी खतरनाक है। राजस्थानी भाषा रै प्रचार-प्रसार रौ सै सूं बड़ौ माध्यम है। तौ आपां नै आपरी ‘रिचनेस’ बताणी है। आपां रौ लोक साहित अर लोकधुनां अखूट है। आं रौ प्रयोग फिलमां में हुवणौ चाइजै। राजस्थान री जिकी पुराणी ‘ग्लोरी’ है जिण वास्तै राजस्थान पूरै संसार में विख्यात है, आं नै चित्रांकन करती फिलमां बणणी चाइजै। अैड़ी फिलमां बणावणियां नै सरकार विशेष मदद करै, नीं क अैड़ी वैड़ी फिलमां नै करमुक्त करी जावै।
मीठेश निरमोही : टी.वी. रै राजस्थानी कार्यक्रमां माथै आपरी टिप्पणी?
रावत सारस्वत : हाल भूंडा है। लोकगीत अर लोकनिरत रै नांव पर इचरज भरियौ प्रसारण हुवै। लोकगीत नीं हुवै उणनै ई अै लोग लोकगीत बतायदै। लोक निरत रै रूप में किणी सेहर में बैठै नै बुलाय नचाय लेवै। ... जरूर जोधपुर कांनी रा लंगा बार बार टी.वी माथै दीखै। आ अेक सीमा है। इण सीमा सूं बारै भी तो बौत सारा कलाकार बैठ्या है। वां लोगां नै भी तो ‘चांस’ मिलणौ चाइजै।
मीठेश निरमोही : दूरदर्शन सूं आप कांई अपेक्षावां राखौ?
रावत सारस्वत : आकाशवाणी री भांत दूरदर्शन में भी राजस्थानी भाषा रौ अेक न्यारौ ‘सेल’ हुवणौ चाइजै। जिणमें राजस्थानी भाषा, साहित अर संस्कृति रौ जाणकार प्रोड्यूसर हुवै।
मीठेश निरमोही : राजस्थानी भाषा-साहित री पत्रिकावां रै संपादण प्रकासण माथै आपरा विचार?
रावत सारस्वत : अकादमी री ‘जागती जोत’ बाबत तो म्है मेहसूस करू हूं’क संपादण रौ काम नीं हुय’र बेगार टाळणै रौ काम हुय रैयौ है। इण पत्रिका रै संपादण सारू चायै डेढ़-दो हजार रुपिया मासिक मानदेय देवणौ पड़ै वां नै उपयुक्त संपादक सूं संपादित करावणी चाइजै। जिकौ समकालीन साहित्य सिरजण सूं जुड़ियोड़ौ हुवै। पण घणै दुख री बात है क जिण भांत जैड़ी कैड़ी भी रचना मिळी, वै भर्ती में भर जावै।
मीठेश निरमोही : नुंवी शिक्षा नीति 10+2 में राजस्थानी भाषा री घोर उपेक्षा हुई है आप कांई कहस्यौ?
रावत सारस्वत : आ तौ आपां री कमजोरी है। पैली सरू में औ सवाल उठियौ हौ। अठै प्राथमिक शिक्षा ‘अेक्ट’ बणियोड़ौ है, बैं माथै चर्चा हुई। बैं में है—बच्चां नै उणां री मां री बोली में पढायौ जावैगौ; पण जतन कोई नीं करिया है।
मीठेश निरमोही : प्राथमिक शिक्षा सूं लेय’र हायर सैकण्डरी (10+2) तांई अनिवार्य रूप सूं राजस्थानी में शिक्षा दिरीजणी चाइजै के नीं?
रावत सारस्वत : हां, अनिवार्य रूप सूं दिरीजणी चाइजै। औ सब सूं अहम मुद्धौ है। असली प्रचार रौ माध्यम तौ शिक्षा ई है। साहित तौ ठीक है, साहित्यकारां रै वास्तै है। ‘जनरल’ जकौ है। विद्यार्थियां में प्रचार हुवणौ चाइजै। वां में सूं लड़का मंत्री बणसी तद राजस्थानी रौ भलौ हुसी। वां नै राजस्थानी री पीड़ हुसी अर वै राजस्थानी सारू कुछ करसी। बौत अफसोस री बात है क जन प्रतिनिधि वोट राजस्थानी में बोल’र मांगै अर राजस्थानी री बात करतां वांनै सरम आवै। नुंवी शिक्षा नीति 10+2 मांय अनिवार्य रूप सूं राजस्थानी पढायी जावै।
मीठेश निरमोही : राजस्थानी पाठ्यक्रम किंयां बणनौ चाइजै? बदळाव इत्याद...?
रावत सारस्वत : आपां नै सावचेती बरतणी है। पाठ्यक्रम बणावण आळां नै चाइजै क विषयां रै जाणकारां, यथा—कथाकार, कवि अर दूजी विधावां रा समर्थ लेखक ई कमेटी में लिरीजणा चाइजै। अबार आ स्थिति है 'क राजस्थानी विषयां रौ पाठ्यक्रम गैर राजस्थानियां रै हाथ में है। किस्यी विचित्र बात है। जठै तांई बदळाव री बात है, पाठ्यक्रम संतुलित हुवणौ चाइजै। परंपरा सूं जुड़ाव जरूरी है।
मीठेश निरमोही : आधुनिक राजस्थानी कविता अर कवियां नै ‘जनरेशन गैप’ कैय’र तौ आप नकार को सकौ नीं!
रावत सारस्वत : नीं सा, लोग कैया है म्हनै 'क ‘जनरेशन गैप’ है। आप नीं समझ सकौ। म्हैं तौ म्हारी जाण में तौ देखौ 'क म्हैं पढियौ-लिखियौ भी ठीक-ठाक हूं अर बैं कै अलावा इत्ता बरस हुयग्या है। साहित्य में अंग्रेजी, हिंदी सारौ साहित्य जाणूं-करूं हूं। म्हैं ‘प्रज्यूडिस’ तौ हूं नीं।
मीठेश निरमोही : लघु पत्रिकावां बाबत आप कांई सोचौ?
रावत सारस्वत : लघु पत्रिकावां जित्ती ज्यादा निकळ सकै, इस्या जतन हुवणा चाइजै। जित्तै तांई निकळ सकै, निकळनी चाइजै। आं सूं ई केई प्रतिभावां सामी आवै। सरकार कानी सूं ‘सबसीडी’ रै रूप में आर्थिक मदद मिळणी चाइजै। पत्रिकावां नै पनपावण खातिर कम सूं कम 500 प्रतियां री खरीद सरकारी स्तर माथै अनिवार्य हुवणी चाइजै। पत्र-पत्रिकावां नै पनपावण सारू अलग बजट हुवणौ चाइजै। पण आपां री बात नै कुण सुणै? प्रदेश री ‘पोलिटिक्स’ इण रूप सूं बोदै हाथां में है।
मीठेश निरमोही : आप ‘मरूवाणी’ बरसां तांई निकाळी। आपरा खाटा-मीठा अनुभव?
रावत सारस्वत : ‘मरूवाणी’ नै लेखकां रौ पूरौ सहयोग रैयौ। सरकारी खरीद जद बंद हुयी, पत्रिका भी बंद हुयगी। सरकार 500-700 प्रतियां खरीदती ही। अर्थाभाव रै कारण बंद करणी पड़ी। जे सरकारी मदद मिळनी सरू हुय जावै तौ म्है चावूं क ‘मरुवाणी’ पाछी सरू करूं।
मीठेश निरमोही : आप ‘राजस्थानी भाषा प्रचार सभा’ रा सचिव भी हौ, पैली इणरी गतिविधियां चावी ही, अबै बंद-सी है।
रावत सारस्वत : गतिविधियां में अेक तौ ‘मरूवाणी’ छपती ही। बंद हुयगी। कारण बताय दियौ। सन् 60 सूं परीक्षावां चला राखी है। म्हैं फीस रै बदळै पुस्तकां देवां अर आं वास्तै देवां 'क जे पुस्तकां बांरै घरां में पड़ी रैसी तौ वां रै टाबरां अर परिवार में राजस्थानी रा संस्कार पड़सी।
मीठेश निरमोही : लारली टैम केन्द्रीय अकादमी रा जिकौ पुरस्कार दिरीज्या है, आपनै बंदरबांट सी नीं लागै?
रावत सारस्वत : आ बात तौ कियां कैय सकां, क्यूं 'क जद कायदौ पूरौ है। कायदै-नियम सूं ही तौ दुनिया चालै है!
मीठेश निरमोही : आप बरसां तांई साहितकारां रै प्रतिनिधि रै रूप में राजस्थान साहित अकादमी, उदयपुर रै राजस्थानी विभाग ‘संगम’ सूं जुड़िया रैया। अर पछै कैलाशदान जी उज्जवळ रै अध्यक्षकाळ में आप राजस्थानी भाषा, साहित अर संस्कृति अकादमी रा उपाध्यक्ष बणिया। अर यकायक आप अकादमी सूं अस्तीफौ देय दियौ। कांई कारण रैया?
रावत सारस्वत : अस्तीफौ तौ म्हैं बठै की अन्दरूणी ‘पॉलिटिक्स’ अर अकादमी री अव्यवस्था रै खिलाफ दियौ। अकादमी में अेक हद तांईं मनमानी हुवण लागगी ही अर निर्णयां रै खिलाफ काम हुय रैया हा। ईं वास्तै म्हैं व्यक्तिगत दुसमणी लेणै री बजाय आ ही ठीक समझी 'क आपां अळगा हुय जावां।
मीठेश निरमोही : समकालीन राजस्थानी सूं आप कांई अपेक्षावां राखौ?
रावत सारस्वत : म्हैं अनुभव कर रैयौ हूं 'क लोग लिखै तो ठीक है, पण वां कौ अध्ययन बौत कम है। दूजी भारतीय अर विदेशी भाषावां में जकौ लिखीज रैयौ है, उणनै पढणौ जरूरी है। अर आज रा रचनाकार पढै भी तौ उणसूं तुरंत प्रभावित हुय’र लिखै, जिण सूं उणरी छाया आ जावै। पचाय’र लिखै तौ इणसूं बचियौ जा सकै।
मीठेश निरमोही : समकालीन राजस्थानी साहित्यकारां री हर जगै, चायै क्षेत्रीय हुवौ के केन्द्रीय अकादमी—उपेक्षा हुय रैयी है।
रावत सारस्वत : म्हैं तो पूरौ सहयोग देवण नै त्यार हूं। इण ‘जनरेशन’ नै बढावण सूं ई राजस्थानी बढसी। आं नै सम्मानित पुरस्कृत करणा चाइजै। जठै तांई राजस्थानी अकादमी बीकानेर री बात है, उणरौ विधान बौत ई गळत है, बदळणौ चाइजै। समकालीन साहित्यकारां नै प्रतिनिधित्व मिलणौ चाइजै। अकादमी वगैरा भी बां नै ई सूंपी जाणी चाइजै। इणसूं वां री योग्यता री कूंत हुसी।
नुंवौ राजस्थानी साहित म्हैं बौत पढूं-लिखूं भी हूं। ‘डेडीकेटेड’ लेखकां री घणी जरूरत है। लगन सूं सिरजण करै तौ गुंजायस बौत है।
मीठेश निरमोही : आपरौ मौलिक सिरजण?
रावत सारस्वत : म्हैं कविता, कथा अर लेख लिख्या है। लिख्यौ घणौ है, छप्यौ बौत कम है। अबार समकालीन संस्कृति नै उजागर करण सारू अेक उपन्यास लिख रैयौ हूं। म्हारी नाटक में भी रूचि है।
मीठेश निरमोही : ‘माणक’ बाबत आपरा विचार?
रावत सारस्वत : पत्रिकावां री सै सूं बडी भूमिका तौ राजस्थानी रै प्रचार प्रसार करण री है। मात्र आ अेकली पत्रिका है, जिकी भारत भर अर विदेसां में ई पूग रैयी है। गेटअप भी बौत बढिया है। पारिवारिक पत्रिका है।
मीठेश निरमोही : ‘माणक’ सारू कीं सुझाव?
रावत सारस्वत : ढरड़ै री सामग्री जियां दूहा, आडियां इत्याद री बजय कीं नुंवौ साहित बेसी छापणौ चाइजै। जूनै साहित सूं सैं परिचित है। बार-बार देवणौ खास बात नीं।