म्हैं तो सदीव अेकली ई गायौ है
धोरा धरती रौ चावौ स्हैर बीकानेर, जिण रै हिरदौ कोटगेट। भीड़-भाड भर्यौ वातावरण। जीवणी कनी अेक सीधी पक्की सड़क ‘गुण प्रकाशक सज्जनालय’ रै ठीक कनै सूं ‘विश्वज्योति’ सिनिमै रै आगै सूं ‘जोशीवाड़ै’ में जावै। जोशीवाड़ै सूं आ सड़क ‘दाऊजी मिंदर’ कानी जावै। दाऊजी मिंदर सूं दो पांवडां पैली सड़क रै किनारै डावी कानी बहादुर सिपाही नोगजां पीर री इतियासिक दरगाह है। इण दरगाह रै ठीक सामी अेक लाल पत्थर री तीन मंजिली इमारत है। इण इमारत माथै निजर गयां दूसरी मंजिल माथै दस छोटी-बडी खिड़कियां निंगै आवै। वां खिड़कियां में सूं डावी कानी सूं तीसरी खिड़की में सफेद गाभा पैर्यां, चस्मौ लगायां अेक व्यक्तित्व देख्यौ जाय सकै। ओ व्यक्तित्व सुबै 6 बजियां सूं देर रात तांई अमूमन देखण नै मिलै।
इण व्यक्तित्व री आवाज रै जादू नै आज आखी दुनिया जाणै। भुलायां नीं भुलीजै किणी सूं ई। इत्तौ गजब रौ असर है इण आवाज में। पण सवाल ओ इज पैदा हुवै क आपरी सारी उमर गायन रै प्रति समर्पित कर्यां रै बाद ई हासल कांई कर्यौ! प्रशंसकां रौ उमड़तौ दरियाव, शोहरत री बरसती बिरखा अर हर गाईजतै गीत रै साथै जमानै भर में बढती इज्जत तो जरूर हासल हुई।
संगीत री दुनिया में अपवाद बणीं इण सुर-मलिका री शोहरत रौ अंदाजौ अपणै आप में अनोखौ है। इण गायिका री आवाज रा देस री बड़ी-बड़ी रिकार्ड-कंपनियां रिकार्ड बणाया है। भारत सरकार सन 1982 में इणनै पद्मश्री री उपाधि सूं सम्मानित ई कर्यौ है। हां, अल्लाह जिलाई बाई ई नांव है इणरौ जिणनै लोग सम्मान देवता थका ‘मरु-कोकिला’ ई कैवै।
इतियास इण बात री साख देवै क धोरा धरती रा लोकगीत जठै बौत ई धनी रैया, उठै रियासती जमानां में राजम्हैलां में गाईजण वाळा गीत ई किणी हालत में लारै नीं रैया। आ बात न्यारी है क आजादी रै बाद तो दरवारां में गाईजण वाळै गीतां री तो अेकदम कमर ई टूटगी। आज संगीत री दुनिया में लोकगीत गावण वाळां री तो नवी पींढी त्यार हुय रैयी है, पण दरवारी गायन आपरै गौरवशाळी अतीत माथै आंसू बहावतौ थकौ खातमै रै कगार माथै ऊभौ है। आज किणनै फुरसत है जको दरबारी गायन नै खतम हुवण सूं बचावै। राजस्थान में मांड गायकी रै दरबारी कलाकारां में फगत बीकानेर री अल्लाह जिलाई बाई अर जोधपुर री गवरी देवी ई आज मौजूद है। लारलै बरस बी.बी.सी. लंदन वाळा प्रोग्राम देवण सारू इणां नै लंदन बुलाया हा। आं दोनूं कलाकारां आपरौ कोई शिष्य आज तांई त्यार नीं कर्यौ। राजस्थानी संगीत रौ ओ दुरभाग नीं तो ओर कांई है!
लारलै दिनां जद अल्लाह जिलाई बाई रौ इंटरव्यू लेवण नै उणरै निवास-स्थान गयौ तो मालूम पड़्यौ इणां नै पान खावण रो हदभांत ई शौक है। सुबै सूं ले’र देर रात तांई उणां रै मूंडै में पान देख्यौ जाय सकै। प्रस्तुत है उणां सूं हुई बातचीत रा खास-खास अंश—
इसरारहसन कादरी : आजादी सूं पैली अर आजादी रै बाद री दरबार-गायकी में आप कांई फरक मैसूस करौ?
अल्लाहजिलाई बाई : पैली फगत अेक सगम नै खुस करण सारू गावणौ पड़तौ हौ, आज जनता री इंछा मुजब गावणौ पड़ै। रजवाड़ां रै बखत में बिना पइसां गावणौ सिखायौ जावतौ हौ। आज कोई ई कलाकार बिना पइसां नी तो सिखावणी चावै अर नीं ई गावणी। हां आज पइसौ अर शोहरत दोनूं ई मिलै।
इसरारहसन कादरी : आप बीकानेर राजघराणै नै कित्तै बखत तांई आपरी सेवावां दी?
अल्लाहजिलाई बाई : म्हैं बीकानेर रारजघराणै री सेवा में सत्ताईस बरस, दस म्हीनां अर सात दिनां तांई रैयी अर बीस बरस दाता गंगासिंहजी री सेवा में।
इसरारहसन कादरी : आप गंगासिंहजी रै बारै में कांई कैवणी चावौ?
अल्लाहजिलाई बाई : दाता सगळां में अेक हा। बावन रजवाडां में अैड़ो कोई राज नीं हौ जिणनै देखण सारू निजरां बेताब रैवती। पण जद वे सामी आवता तो निजरां उठायां नीं उठती ही। दरबार में अमूमन वे कैवता रैवता—जिलाई बाई, थोड़ौ ऊपर देख’र गाया करौ। अबै आपनै कांई बतावूं, म्हैं जकौ कीं कर्यौ वो दाता री सेवा में बौत कम हौ। ओ म्हारो सौभाग हौ क म्हनै दाता री सेवा करण रौ मौकौ मिल्यौ। आज म्हैं दाता रौ दियोड़ौ इज तो खाय रैयी हूं।
इसरारहसन कादरी : दरबार में आप किण-किण खास अवसरां माथै गाय करता? कांई बीकानेर रै सेठां री हवेलियां में ई गावण नै कदैई गया?
अल्लाहजिलाई बाई : दरबार में होळी, दीवाळी, दसरावै अर तीज तिवारां रै अलावा दरबार री सालगिरह अर दूजै राजकीय समारोहां रै मौकां मायै गाया करती। रैयी बात सेठां री तो सेठां रै अठै पोली ई गाया करती ही अर आज ई गाया करूं हूं।
इसरारहसन कादरी : आप आ तो बतावौ क रियासती जमानै में आपरै साथै कुण-कुण सगत कर्या करता? कुण-कुण-सी गायक जातियां ई उण बखत?
अल्लाहजिलाई बाई : उण जमानै में म्हारै साथै संगत करण वाळां में उस्ताद गहने खां, शम्सू अर रख्तेखां हा। उण बखत री गायक जातियां में मिरासी, ढोली, भगतण, तवायफ, जागरी पातर समेत केई नांव गिणाया जाय सकै है।
इसरारहसन कादरी : रियासती जमानै में आप कुण-कुण से गायक-गायिकावां नै सुण्यौ? कांई आपनै गावण सारू दूजी रियासतां में जावण रौ मौकौ मिल्यौ?
म्हैं बीकानेर दरबार में बड़ौदै री गंगू बाई अर ईदन बाई, पालणपुर री टोकी बाई अर सिरी बाई ने जैपुर री गौर बाई अर बिब्बौ बाई नै सुण्यौ। अै शादी-ब्याव रै मौकां माथै अठै गावण नै आवती ही।
जठै तांई रियासत सूं बारै जावण रौ सवाल है, म्हैं उदैपुर, जैपुर, जोधपुर, कोटा अर किशनगढ जैड़ी बडी-बडी रियासतां में जा’र खूब गायौ अर ईनाम अर शोहरत ई घणी पाई।
इसरारहसन कादरी : उण जमानै में आपरै साथै गावण वाळी महिलावां कुण-कुण ही?
अल्लाहजिलाई बाई : म्हैं तो सदीव अेकली ई गायौ है। पण संगीत-स्कूल में बख्तावरी, सरस्वती, रतनजोत, मैना बाई इत्याद रै साथै गावती अर सीखती ही। दरबार में या किणी समारोह में किणी रै साथै मिल’र म्है कदैई नी गायौं हैं।
इसरारहसन कादरी : आजकाल खास तौर सूं आपरै साथै कुण-कुण संगत करै?
अल्लाहजिलाई बाई : म्हारै साथै तबलै माथै दिल्ली रा दायम अली अर सारंगी माथै जोधपुर रा उस्ताद संगत करै।
इसरारहसन कादरी : आप आपरी संगीत-साधना रै बारै में बतावो! आ ई बतावौ क आपरा उस्ताद कुण हा?
अल्लाहजिलाई बाई : होश संभाळता ई आठ बरस री उमर में म्हैं उस्ताद हुसैनबख्श लंगड़ै सूं संगीत री शिक्षा लेवणी सरू करी। अे ई म्हारा उस्ताद हा। अेक दिन उस्तादजी म्हनै लालगढ पैलेस में दाता (बीकानेर महाराजा गंगासिंहजी) रै सामी लेयग्या। वे म्हारा गीत सुण’र घणा राजी हुया अर म्हनै ‘बीकानेर म्युजिक स्कूल’ में भरती करवाय दिया।
स्कूल में म्हैं संगीत री विधिवत शिक्षा लीवी। उण स्कूल में अच्छन महाराजा, लच्छू महाराज अर शिब्बू महाराज सूं मांड, दादरौ, ठुमरी, निरत अर हारमोनियम सीख्यौ। वा दिनां हर हफ्तै दरबार मे हाजरी हुया करती ही, म्हां गाया करता हा अर दरबार रा सगळा लोग सुण्या करता हा। स्कूल में म्हनै वजीफै रै तौर माथै सरूआत में दो रुपिया महीना मिलता हा जका बढता-बढता बाद में 6, 14, 20 अर आखिर में सन 1949 में, जद क स्कूल बंद हुयौ हौ, 150 रुपिया मिलता हा। पुरस्कार अलग सूं मिलता हा।
इसरारहसन कादरी : आप आपरौ सारौ जीवण ई संगीत साधना में बितायौ है, आप आ बतावौ क आज भारतीय संगीत आपां रै सामी किण रूप में हुवणौ चाइजै?
अल्लाहजिलाई बाई : आपां रै अठै आज भारतीय संगीत अर पाश्चात्य संगीत री साधना करण वाळा कलाकार खूब है। पण आज रा कलाकार पाश्चात्य संगीत री धुनां री नकलां करै। भारतीय कलाकारां नै चिजै क वे कोई ई धुन बणावता थका प्राचीन भारतीय संगीत रा सिद्धांत सामी राखै। जे वें इस्यौ करैला तो अठै रा सुणणिया तो आतमविभोर हुवैला ई, आपां रौ संगीत ई सुरक्षित रैया सकैला। इणसूं उणां री खुद री मैनत तो सार्थक हुवैला ई संगती-मर्मज्ञां नै ई कीं सुणण नै मिलैला। म्हारौ तो ओ ई कैवणौ है इण भांत सूं साधना करिया ई कलाकार नै सही रूप में प्रतिष्ठा मिलैला अर भारतीय संगीत रौ सही स्वरूप ई जीवतौ रैवैला।
इसरारहसन कादरी : आजकाल संगीत-संध्यावां में सुणणियां री संख्या लगौलग कम क्यूं हुवती जा रैयी है?
अल्लाहजिलाई बाई : इणरा केई कारण हुय सकै है। अेक कारण तो साफ तौर सूं ओ इज है क आज रै कलाकारां री मानसिकता धन कमावण री हुयगी है। धन कमावण रै लोभ में वो कला नै झुकाय देवै. इस्यौ म्हांरै जमानै में नीं हुवतौ हौ। आज आपां साफ देखां क व्यापक रूप सूं बडै-बडै प्रोग्रामां में शोहरत पावण री कलाकारां री चावना उणां नै सुणणियां सूं जोड़ नी पावै। आ ई वजै है सुणणियां री संख्या आज लगौलग कम हुवती जा रैयी है। कलाकारां नै तो सुणणियां री मानसिकता नै देखणी हुवैला।
इसरारहसन कादरी : कांई अबै राजस्थान में आपरै अलावा परंपरागत ढंग सूं गावण वाळा गायक-गायिकावां है?
अल्लाहजिलाई बाई : म्हनै तो आखै राजस्थान में अेक जोधपुर री गवरी बाई रै अलावा कोई दिखाई नीं देवै।
इसरारहसन कादरी : कांई आप किणी नै आपरौ गायन सिखायौ है?
अल्लाहजिलाई बाई : कोई सीखण नै आवै तो म्हैं सिखावूं है। क्यूंक आज किणी नै ई इत्तो फुरसत नीं है क वे बरसां लग मैनत करै। लोग तो रातौरात मशहूर हुवणा चावै।
इसरारहसन कादरी : आखिर में, आप आपरै अर आपरै परिवार रै बारै में तो कीं बतावौ!
अल्लाहजिलाई बाई : इण बगत म्हारी उणर लगै-टगै 86-89 बरस री है। म्हांरौ परिवार बीकानेर में उदैपुर सूं आयौ हौ। सबसूं पैली म्हारा दादाजी अर उणां री बैन आया हा। तद सूं ई म्हां अठै रैय रैया हां।
इसरारहसन कादरी : कांई आपरै परिवार में और कोई गायक-गायिकावां हुई है?
अल्लाहजिलाई बाई : म्हारी नजीर भुवा बौत बडी गायिका हुई। जड़ाव अर हुसैनी भुवा ई अच्छौ गा लेवती ही। मिनखां में तो कोई गावणियौ हुयौ कोनीं। मां नै गावणौ नी तो आवतौ हौ अर नी ई वा सीख्यौ। अर बेटी बेगम नै म्हैं सिखायौ ई नीं। अेक दोयती नवासी जरूर सितार बजावै। बस!
