सजळ-नैणां री निजर बा, याद नित आयां सरै!
याद आवै है, जणा आ गजल भी गायां सरै!
निजर ओलैसी'क सारै काम जद-जद जीभ रो!
चुप कियां रैवै, हियै रो हेत जतळायां सरै!
प्यार री भाषा, जुगां सूं आसुवां में भीजणी!
पीड़ रै दरियाव में तो यार! नित न्हायां सरै!
ना कुणी देखी-सुणी, पण बात गुपचुप होयगी!
फूल, जे फूलै कठैई, गंध मैकायां सरै!
प्यार, कुदरत रो करिस्मो, रीत, जिनगाणी-तणी!
भाव हिरदै में उठै, पण होठ पर आयां सरै!
छायगी मन-प्राण उपरां, रूप री आ च्यानणी!
अेकलै नै आवड़ै कद, याद परणायां सरै!
तू अठै कोनी, अठै मैं भी नहीं होतां-थकां!
फेर आपां हां कठै? आ बात अरथायां सरै!
