तन सूरज रौ काळौ कित्तौक
मन माणस रौ काळौ कित्तौक
अपणी रंगत अर अपणी रम्मत
पच्छम जग रौ चाळौ कित्तौक
मांदौ पड़ग्यौ भायप चानणौ
तम नफरत रौ फाळौ कित्तौक
जीवण री जूनी चळगत में
नवी सोच रौ ढाळौ कित्तौक
ऊपर नीचै, नीचै ऊपर,
लख मकड़ी रौ जाळौ कित्तौक
मारग अबखौ आघी मंजळ
कुण चालैला पाळौ कित्तौक
सांपां री बस्ती में जीवै
चिड़कली रौ माळौ कित्तौक
डूंगर-डूंगर ठाकर डेरा
मिनखाचारी मेळौ कित्तौक
आतंक री 'रैयाण' जमी है
रंग कंसूबौ गाळै कित्तौक
भूख-तिरस री जबर यातना
खम्मा-खम्मा रौ रोळौ कित्तौक
अवस उघड़सी भेद कूड़ रा
सच रै होठां ताळौ कित्तौक
गंगा-जळ तौ पावन अमरत
मिळे कीच रौ नाळौ कित्तौक
ईमान-धरम रौ बद बौपारी
बोलौ, देस रुखाळौ कित्तौक
खुद सूं ई खुद पूछ बावळा
जण-गण-मन रौ व्हालौ कित्तौक
