सपना है सोवणा तो हकीकत बणां’र देख
संसद रै ई नीं, सड़क रै जणा-जणा नैं देख।
दरबार री सजावटां आला घणीं हजूर
जो झुग्गियां में सिड़ रह्या थोडो वणां नै देख।
खुद री निजर में ऊजळा ईमानदार सै
सिक्को जो खरो है तो उणनैं टणटणां नैं देख।
बातां घणीं करै है तपस्या री, त्याग री
पण लाळसा में बल रह्या जणा-जणा नै देख।
यूं मिनख लाचार है, दुबळो है, दुखी है
पण, तो ई उणरै मांयलै मिनखापणां नै देख।
जो गाज बदळता हा राज नैं, समाज नैं
‘श्रीमाळी’ राज बदळियां थोडो अणां नै देख।
