थू मनै मिलै या नहीं मिलै म्हूं गीत मिलण रा गाऊंला
थू भूल सकै तो भूल भला म्हूं भूल्या नहीं भुलाऊला
नैणा रै राता डोरा में
उलझी ओळू री घड़ियां में
आसा री सासा में अटकी
गीता री मीठी कड़िया में
हिवड़ै में राखूं जड़ आगळ उजड़्यो संसार बसाऊला
थू मनै मिलै या नहीं मिलै म्हूं गीत मिलण रा गाऊला
जिण सू मिलणै री आसा में
जीवण री रग-राता ढळगी
जिण खातर रो-रो आंख्या पर
धूंधळ छाई पलका गळगी
इण भौ में पल्लो छूट गियो अगलै भौ में मिल जाऊंला
थू मनै मिलै या नहीं मिलै म्हूं, गीत मिलण रा गाऊंला
चंदै में चमक-चादणी ज्यूं
हिवड़ै री रमगी रग-रग में
हर सूरत में थारी मूरत
दीखै पग रुकज्या मारग में
अंतस री आतस आसू पी तन-मन री तपत बुझाऊंला
थू मनै मिलै या नहीं मिलै म्हूं गीत मिलण रा गाऊला
भूलण रा जितरा जतन किया
जागी मन हूक-सी मिलणै री
सुळझाई ज्यूं-ज्यूं उळझ-उळझ
गांठा घुळगी नीं खुलणै री
भीतर ही भीतर घुळ-घुळ कर जीवण जंजाळ बणाऊंला
थू मनै मिलै या नहीं मिलै म्हू गीत मिलण रा गाऊला
मर जाऊ तो इतरी मैर करी
सग हाल मुसाण पुगा दीजे
कोमल रेसमिया हाथां सू
अरथी में आग लगा दीजे
थारी छाया तक पड़णै सू, मरिया मोखातर पाऊंला
थू मनै मिलै या नहीं मिलै म्हूं गीत मिलण रा गाऊंला
थू भूल सकै तो भूल भला म्हूं गीत मिलण रा गाऊंला
