आ माथै मांग पुरायां
मेंदी दोनूं हाथ रचायां
पगल्यां कुं-कुं-रंग-रंगायां
मेवलो नैणां सूं बरसाती म्हारी लडवण चाली सासरै।
बाळपणो ज्यूं लारै छूटै, मैंमत-जोबन आवै रे
पीवरियो यूं लारै छूटै, सासरियो अब आवै रे
सासू देसी सुख-आसीस
नणदल करसी छिण-छिण रीस
लुगायां बातां करसी बीस
मेवलो नैणां सूं बरसाती, म्हारी लडवण चाली सासरै।
ओळूं रै सुर मायड़ रोवै, बाबल सुण-सुण रोवै रे
भावज-बीर नैण रा मोती, ओळूंड़ी में पोवै रे
नैन्ही बैन उणमणी होवै
संग-सहेल्यां खुल-खुल रोवै
छोटो बीर बैन नै जोवै
मेवलो नैणां सू बरसाती, म्हारी लडवण चाली सासरै।
बाबाजी रो बाग-आंगणो, सूनो करनै चाली रे
पणघट सूनो-सूनो दीसै, मनड़ा खाली-खाली रे
घूंघटो सावळ लडवण काढ़
ल्हुकोले, आंसूड़ां री बाढ़
कै पूठो आवैला आसाढ़
मेवलो नैणां सूं बरसाती, म्हारी लडवण चाली सासरै।
अणसेंधै–आंगणियै जाणो, पिव संग हेत जुड़ाणो रे
अणजाण्या जाण्या बण जासी, ओ तो देस बिराणो रे
सासू-सुसरो मारग जोवै,
देवर-जेठाण्यां राजी होवै
नणदल मुळक-मुळक खुस होवै
मेवलो नैणां सूं बरसाती, म्हारी लडवण चाली सासरै।
