लहरावण नै खेत गोरी रो हिय हुळसावण नै
टाबरियां री टोळ, मुळकतो तेजो गावण नै
गाज-गूंजतो, पळका करतो लूम-झूमतो छाव
मेघा आव रे! म्हारोड़ै गांव रे!
तिसिया जीव-जीनावर बिलखै, पड़ै तिंवाळो खाय रे
सिसकत सांस गळै में अटकै, अड़क मौत मरजाय रे
मरतोड़ां रा प्राण बचावण डैर-डूंगरां छाव
मेघा आव रे! म्हारोड़ै गांव रे!
तिसां मरता रूंख सूखग्या, पंछीड़ा कुरलाय रे
ताप बिखै में पड़ी बिजोगण चंद्रबदन कुम्हलाय रे
बिलखतड़ां रो ताप मिटावण, गांव-गोखड़ां छाव
मेघा आव रे! म्हारोड़ै गांव रे!
हाळी हळिया हाथ संभाळै, सुरंगा सुगन मनाय रे
नर-नारी-नारा नखराळा, कर मनवार बुलाय रे
मीठी टेर सुणावण तेजो, खेत-खेड़ां पर छाव
मेघा आव रे! म्हारोड़ै गांव रे!
