मुख में पान होंट पर लाली लाज भरी नैणा मं।
बचपन बीत गयो बतलावै दरपण सूं सैणा मं॥
उठै मरोड़ा मीठा आवै अणजाण्या साजन की याद ।
हरी चूड़ियां खणक-खणक बोहरा सी याद दिलावै म्याद॥
नैणां नीरज नीर निगोड़ा निर्मोही रैणा मं।
बचपन बीत गयो बतलावै दरपण सूं सैणा मं॥
धोळी-धोळी चटक चांदनी में रळके चूनड़ की कोर।
मुखड़ा को उजियास देख पंछीड़ा समझे होगी भोर॥
जोबन में मदमाती मखणा गाळ्यां दे मैणा मं।
बचपण बीत गयो बतलावै दरपण सूं सैणा मं॥
काळा-काळा बादलिया मं चमकै तड़ित सुनहरो रेख।
हंसै पोवणी मांग भर्यां थोड़ी निजरां ऊँची कर देख॥
पिया मिले मतवाळी जोगण जोबन धन गेहणा मं।
बचपन बीत गयो बतलावै दरपण सूं सैणा मं॥
काळी-काळी केस घटावां झूम उठी भंवराँ की पाँत।
विश्वामित्र घणा घर डौले प्रेम भिखारी बणी जमात॥
तस तड़फण तड़कै पड़का में अगन पड़ै छैणा मं।
बचपण बीत गयो बतलावै दरपण सूं सैणा मं॥
