तनै टेवटौ घड़ाद्यूं
तनै पैजणी पहराद्यूं
तनै बाजूबंध ल्याद्यूं, मेरै फूलियै री मा
नागौरी-बळदां नै बेगी पांणी पाय'र ल्या
तनै कांगसी मंगाद्यूं
तनै आटी-डोरा ल्याद्यूं
माथै हींगळू लगाद्यूं, मेरै फूलियै री मा
करां हळसोतियौ तूं छाक लेय'र आ
तनै अंगरखी सिंवादयूं
तनै कांचळी मंगाद्यूं
तनै घाघरौ रंगाद्यूं
पीळो पोमचौ बंधाद्यूं
ऊपर मोरिया छपादयूं, मेरै फूलियै री मा
कसिया-गंडासी मेरै हाथ देती जा
तनै बिछिया घड़ाद्यूं
दांतां चूंप चिमकाद्यूं
मोत्यां बोरलौ जड़ाद्यूं मेरै फूलियै री मा
नागौरी-बळदां नै बेगी पांणी पाय'र ल्या
तनै टेवटौ घड़ाद्यूं
तनै पैजणी पहराद्यूं
तनै बाजूबंध ल्यादयू, मेरै फूलियै री मा
नागौरी-बळदां नै बेगी पांणी पाय'र ल्या
